Sekretáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

DILI, 23 setembru 2020 (TATOLI)-Sekretáriu Estadu Komunikasaun Sosiál, Merício Juvinal dos Reis ‘Akara’ husu ba públiku labele fiar boatu ne’ebé lansa kona-ba konjelamentu fundu petrolíferu, tanba boatu ne’e konsidera hanesan lia falsu ka hoax.

“Boatu ka hoax sira ne’e ita labele dezenvolve iha ita-nia rai tanba bele estraga armonia sosiál no komunikasaun iha ita-nia nasaun. Ita hatene katak Estadu Unidu Amérika (EUA) nu’udar nasaun ne’ebé bo’ot no laiha hanoin klo’ot,” dehan Sekretáriu Estadu Akara, hanesan haktuir iha nota ne’ebé Agência Tatoli asesu, kuarta ne’e.

Notísia Relevante: Prosedimentu transferénsia fundu Petrolíferu bazeia ba lei

SEKOMS lansa kampaña nasionál kontra hoax no promove internet saudável

Foin lalais ne’e, lansa informasaun iha públiku nia le’et, katak maski Governu aprova ona Orsamentu Jerál Estadu (OJE), Federal Reserve Bank EUA labele halo likidez tanba iha prosedimentu ne’ebé Estadu Timor-Leste presiza kumpre.

Membru ezekutivu ne’e dehan, relasaun entre Governu Timor-Leste EUA la’o ho di’ak, laiha problema no nasaun rua kontinua respeita malu no mantein kolaborasaun di’ak.

“Liga ba asesu fundu petrolíferu, iha ona nia lei no regra rasik ne’ebé mak Governu Timor-Leste kumpre nune’e to’o oras ne’e sistema sei funsiona ho normál,” nia subliña.

Nune’e, governante ne’e husu populasaun atu haree didi’ak bainhira atu konsumu informasaun ne’ebé fó sai hosi fontes ne’ebé de’it.

“Presiza tetu no haree didi’ak ba informasaun ne’e loos ka la loos no tenke verifika hosi mídia ka fontes ne’ebé fó sai,” nia fó hanoin.

Atu kombate hoax, SEKOMS husu konsumu informasaun hosi fontes kredível hanesan mídia profesionál ka fontes hosi Governu.

“Labele pániku ho hoax ka boatu sira ne’ebé espalla iha komunidade liuhosi rede sosiál,” nia hatutan.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here