Prezidente Komisaun B, Deputadu José Agostinho Sequeira Somotxo.

DILI, 23 setembru 2020 (TATOLI)—Parlamentu Nasionál liuhosi Komisaun B (Negósiu Estranjeiru, ohin, husu Ministériu Negósiu Estranjeiru no Kooperasaun (MNEK) atu orienta reprezentasaun diplimátika sira iha rai-li’ur atu konsolida tendénsia apoia ba Timor-Leste iha ámbitu prevensaun COVID-19.

Notísia Relevante: MNEK hamenus osan viajen estranjeiru

“País hotu-hotu ne’ebé mak ita iha reprezentasaun diplomatika la’o di’ak depois konsolida tán  hanesan tendénsia apoia ne’e tenke maka’as. Tanba COVID-19 ne’e halo ita país ida-ne’ebé kiik-oan no kasian, tanba ne’e tendénsia diplomátika ne’e ajuda ita,”  Prezidente Komisaun B, Deputadu Agostinho Siqueira “Somoxo”, informa ba jornalista sira hafoin hala’o audiénsia públika kona-ba orsamentu MNEK nian, iha Parlamentu Nasionál, kuarta ne’e.

Rekomendasaun seluk ne’ebé Komisaun B hato’o ba MNEK mak kontinua mantein imajen Timor-Leste nian iha nasaun seluk ne’ebé reprezenta diplomata sira no husu MNEK solusiona problema dívida ne’ebé diplomata sira hasoru iha rai-li’ur ne’e.

Prezidente Komisaun B ne’e mós lakohi esplika detallu dívida ne’ebé diplomata sira enfrenta iha rai-li’ur. Nia husu ba MNEK reforsa kapasidade no labele husik dívida sira-ne’ebé hanehan reprezentante diplomátika iha rai-li’ur.

Somoxo fó hanoin ba MNEK atu identifika ona probema dívida sira iha rai-li’ur hodi bele selu tanba ezekusaun orsamentu 2020 ne’e la lori tempu naruk.

Iha parte seluk, Prezidente Komisaun B fó hanoin ba MNEK atu servisu hamutuk ho parte autoridade defeza no seguransa tanba MNEK ne’e odamatan boot tama no sai.

“Ami-nia rekomendasaun barak tebes kona-ba defeza no seguransa ba MNEK, tanba hanesan odamatan, buat hotu-hotu tenke liuhosi ne’ebá. Tanba ne’e mak ami-nia rekomendasaun ba mós protokolu estadu nian, lei balun ne’ebé presiza halo para bele dignifika ita-nia diplomata sira,” nia dehan.

Prezidente Komisaun B ne’e mós husu MNEK atu briefing ba situasaun ne’e, tanba hanesa komisaun B no públiku tomak lahatene saida mak  la’o iha mundu kona-ba relasaun diplomatika durante COVID-19 ne’e.

Tuir livru Planu Asaun Nasionál deskreve katak orsamentu MNEK nian iha 2020 hamutuk $20,787,774. Hosi montante orsamentu ne’e prevé ba saláriu no vensimentu $12,732,444, bens no servisu $7,883,020, kapitál minor $143,535 no transferénsia públika $28,775.

Medida prinsipál setoriál MNEK nian ba 2020 mak hanesan responde ho forma efikáz no efisiente, liuhosi implementasaun polítika esterna Timor-Leste nian, nune’e mós fortalese, konsolida no haluan relasaun diplomátika ezistente no atua ho forma resíproka, prepara funsionáriu diplomata ho kualifikada aas liu. 

Ikus liu, nia hateten, atu promove boa governasaun no jestaun institusionál no Ministériu nian no servisu sira hotu iha Ministeriu Negósiu Estranjeiru no Kooperasaun (MNEK).

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here