Ministru Asuntu Parlamentár no Komunikasaun Sosiál, Francisco Jerónimo. Imajen/Egas Cristovão

DILI, 23 setembru 2020 (TATOLI)—Ministériu Asuntu Parlamentár no Komunikasaun Sosiál (MAPKOMS) lideradu Francisco Jerónimo sei fó atensaun ba mídia hotu-hotu iha tinan 2020 hodi disemina asaun Governu nian.

Ministru Asuntu Parlamentár no Komunikasaun Sosiál, Francisco Jerónimo hateten, iha ámbitu fó atensaun ne’e iha outubru, novembru no dezembru.

“Ami-nia orsamentu millaun $4-resin de’it. Ami-nia osan uitoan de’it. Medida prinsipál kontinua diseminasaun informasaun, halo nusá mak mídia sira-ne’e halo parte iha prosesu dezenvolvimentu ka programa Governu nian. Kontinua fó atensaun ba RTTL, Agência TATOLI, mídia hotu-hotu no Rádiu Komunidade sira, halo nusá mak partisipa iha prosesu diseminasaun informasaun ne’e,”  Ministru Francisco Jerónimo informa ba jornalista sira, hafoin aprezenta proposta OJE 2020 liuhosi audiénsia públika ho Komisaun A (Justisa no Konstitusionál), iha PN, kuarta ne’e.

Nia hateten, Governu sei fó atensaun ba Rádiu Komunidade sira iha territóriu tomak atu-bele disemina informasaun iha baze.

“Ami laiha kapitál dezenvolvimentu no laiha kapitál minór, iha de’it de’it saláriu no vensimentu, bens servisu no transferénsia públika. Infraestrutura laiha tanba ami lakohi halo susar ami-nia an tanba se fulan-rua de’it ezekuta fundu infraesturura, bainhira mak loke konkursu. Ami halo tuir de’it ami-nia kapasidade. Ami lakohi atu ambisaun boot liu,” nia dehan.

Nia informa ba deputadu sira iha Komisaun A katak laiha funsionáriu foun no funsionáriu sira uluk mak nafatin.

“Mezmuke Dotasaun Orsamentu Temporáriu maibé ami ezekuta ona 72%. Ami hela de’it 28% para atu-bele kobre fulan outubru, novembru no dezembru,” nia hateten.

Proposta Orsamentu Jerál Estadu (OJE) 2020 hosi Ministériu Asuntu Parlamentár no Komunikasaun Sosiál (MAPKOMS) inklui Sekretaria Estadu Komunikasaun Sosiál (SEKOMS) nian hamutuk millaun $4,368. Hosi montante orsamentu ne’e prevee ba saláriu no vensimentu rihun $884, bens no servisu millaun $1.693 no transferénsia públika millaun $1.790.

Tuir livru Planu Aasaun ne’ebé Agência TATOLI asesu hosi parte asuntu parlamentár nian kontinua asegura koordenasaun regulár ho Parlamento Nasionál, propoin halo polítika no elaborasaun lejizlasaun.

Nune’e mós hosi komunikasaun sosiál nian mak halo regulamentasaun nesesária iha área komunikasaun sosiál nian, ezerse ba superintendénsia no tutela ba órgaun komunikasaun sosiál Estadu nian no koordena hodi hala’o diseminasaun informasaun kona-ba programa asaun Governu nian.

Iha audiénsia públika ne’e akompaña hosi Sekretáriu Estadu Komunikasaun Sosiál, Mericio Juvina “Akara”, no órgaun Estadu sira ne’ebé iha área komunikasaun sosiál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here