Dansa kulturál iha seremónia enserra formasaun no lansa kontratu probatóriu faze 3, iha suku Caenlio, kuarta (23/09). Imajen/UE

LAUTÉM, 23 setembru 2020 (TATOLI)-International Labour Organization (ILO) liuhosi projetu Enhancing Rural Access Agro-Florestry (ERA-AF), konsege reabilita estrada metru 500 iha suku Caenlio, ne’ebé liga direta ba postu administrativu Iliomar, munisípiu Lautém.

Xefe suku Caenlio, Julião Soares, apresia reabilitasaun estrada ne’ebé bele ajuda komunidade iha suku bele asesu ba vila inklui bele transporta produtu ba merkadu iha Iliomar villa.

“Ohin loron importante tebes ba komunidade suku Caenlio, tanba marka istória foun ida ba lansamentu ba estrada rurál no iha tempu hanesan enserra mós programa treinamentu Dom Bosco ne’ebé hala’o prátika ba estrada ho ninian distánsia metru 500, durante fulan-tolu,” dehan líder komunitáriu ne’e ba Agência Tatoli, iha suku Caenlio, kuarta ne’e.

Notísia Relevante: ILO-UE lansa kontratu probatóriu estrada rurál Lautém-Manatuto

Nia haktuir, uluk kondisaun estrada iha suku ne’e ladi’ak no difikulta movimentu transporte no komunidade ba postu administrativu, maibé hafoin reabilita bele ajuda komunidade nia movimentasaun.

“Uluk estrada ne’e ladi’ak, kuandu tempu udan karreta labele mai no eventu ruma iha sede suku karreta sira tenke para iha estrada protokolu no ema la’o mai to’o suku ne’e. Ohin ami kontente tanba maski estrada ne’e realita metru 500 de’it, maibé agora la lori minutu barak ba ami bele to’o ona iha sede suku,” nia akresenta.

Iha fatin hanesan, Ofisiál Responsável Misaun ILO no Jestór projetu ERA-AF, Albert Uriyo, apresia envolvimentu Uniaun Europeia (UE) ne’ebé finansia ona projetu ne’e.

Tuir responsável ne’e, ILO nafatin hatudu kompromisu liuhosi projetu ne’ebé dezeña ona hodi bele kria empregu, dignifika komunidade no sai hanesan medida protesaun sosiál ba vulnerável, joven no labarik sira.

Reprezentante Embaixadór UE, Paulo Toselli, hateten parte UE sei kontinua suporta dezenvolvimentu área rurál no husu Governu kria infraestrutura ne’ebé sustentável hodi liga ba oportunidade serbisu, utiliza rekursu lokál disponível ne’ebé sei uza ho maneira ekilíbriu no responsável.

Nia konsidera estrada foun bele fó oportunidade foun ba komunidade no bele fornese ligasaun merkadu no indireitamente inklui fasilita mobiliza estudante sira no servisu saúde ba komunidade rurál.

Obra ne’e promove inkluzaun entre juventude, vulnerável sira, feto no ema ho difisiénsia sira.

“Projeitu ne’e atu fó oportunidade hanesan ba feto no mane hodi buka serbisu apropriadu tuir kapasidade idaidak ninia,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here