DILI, 23 setembru 2020 (TATOLI)—Proposta orsamentu Prezidénsia Repúblika (PR) nian ba tinan 2020 hamutuk millaun $6.004 no hosi montante orsamentu ne’e kontinua hametin identidade nasionál no mantein relasaun internasionál.
Notísia Relevante: Aban, audiénsia públika ba proposta OJE 2020 hahú
Prezidente-Repúblika nu’udar Xefe Estadu, símbolu no garante independénsia nasional, unidade Estadu nian no regula funsionamentu instituisaun demokrátika.
Proposta OJE 2020 hosi Prezidénsia Repúblika hamutuk millaun $6.044 komposta hosi saláriu no vensimentu rihun $996, bens no servisu millaun $4.961, transferénsia públika rihun $53, kapitál menór rihun $34, laiha kapitál dezenvolvimentu.
Hosi orsamentu millaun $6.044 ne’e koloka ba Gabinete Prezidente Repúblika $500,000, Casa Civil hetan $4,805,990, Casa Militár hetan $737,798.
“Prezidénsia Repúblika ninia programa prinsipál ida mak hametin identidade nasionál, direitu umanus, mantein relasaun internasionál no ikus liu oinsá fó opiniaun ba Governu para atu haree dezenvolvimentu suistentável ne’e,” Xefe Kaza Sivíl, Francisco Maria de Vasconcelos, informa ba jornalista sira hafoin hala’o audiénsia públika ho Komisaun A (Justisa no Konstituisionál) kona-ba proposta OJE 2020, iha Parlamentu Nasionál, kuarta ne’e.
Xefe Kaza Civil ne’e esplika, hosi orsamentu millaun $6.044 ne’e hahú hosi janeiru to’o oras ne’e liuhosi Dotasaun Orsamentu Temporáriu (DOT) ezekuta 50.46%.
“Agora patikamente sei halo aprezentasaun (iha plenária) maibé ami halo ona planu ezekusaun to’o tinan ida-ne’e ramata bele atinje 93% hanesan iha tinan 2019 nian,” nia dehan.
Xefe Kaza Casa Sivíl ne’e fó-sai katak ormanetu Prezidénsia Repúblika nian laiha aumenta maibé halo de’it ajustamentu hahú hosi fulan-janeiru to’o fulan-dezembru 2020.
Tuir dokumentu orsamentál ne’ebé prevee iha livru Planu Asaun Anuál (Livrus 2) nian hosi parte prezidénsia Repúblika prioritiza Bem-Estar Sosiál, Protesaun Sosiál no Sidadania. Iha sidadania ne’e promove partisipasaun, patriotizmu no nasionalizmu.
Nune’e mós konsolida no fortalese defeza, seguransa iha relasaun esterna hanesan instituisaun defeza no seguransa, konsolida no fortalese justisa, demokrasia no direitu umanu no prioridade seluk hanesan dezenvolvimento sustentável.
Medida prinsipál setoriál ba 2020 nian mak hanesan kontribui hodi reforsa identidade nasionál, liuhosi apoia promosaun língua Tétun Portuguesa, afirmasaun valór rezisténsia no valorizasaun patrimóniu nasionál.
Promove no defende Estadu Direitu Demokrátiku liuhosi koezaun no prestíjiu iha defeza no seguransa, no halo promosaun direitu umanu.
Iha medida prinsipál ne’e sei reforsa relasaun internasionál no diplomátika, liuhosi vizita nasaun seluk no organizasaun multilateral, promove dezenvolvimentu sustentável, dezignadamente liuhosi diálogu ho Prezidente Repúblika (Dada-lia ho Lu Olo), halo promosaun no apoiu polítiku ba dezenvolvimentu ekonómiku sustentável, no apoiu prezervasaun ambientál no rekursu naturál.
Ikus liu, reforsa boa governasaun no jestaun institusionál servisu sira iha Prezidénsia Repúblika.
Jornalista: Evaristo Soares Martins
Editór: Cancio Ximenes