sesaun plenaria iha Parlamento Nasional. Imajen Tatoli/Egas Cristovão

DILI, 24 setembru 2020 (TATOLI)–Diretór Ezekutivu Centro Nasionál Chega (CNC), Hugo Maria Fernandes, informa CNC la husu osan barak maibe hela fulan rua (2) ne’e mak CNC husu osan rihun $400 hodi ezekuta programa balun iha tinan ne’e.

“Ami la husu osan barak tanba hela fulan rua (2) de’it  ona. Nune’e, ohin, ami mai husu osan rihun $400 hodi ezekuta programa balun iha fulan rua (novembru-dezembru) ikus ba tinan ida-ne’e,” dehan Diretór CNC, Hugo Maria Fernandes, ba Agência TATOLI hafoin hamutuk ho ekipa Gabinete Primeiru-Ministru hala’o audiénsia públika ba proposta Orsamentu Jerál Estadu (OJE) 2020 hamutuk ho komisaun A ho C, iha sala plenária Parlamentu Nasionál, Dili, kuara ne’e.

Nia hatutan, osan ne’ebé mak aloka ba CNC iha 2020 to’o fulan outubru ne’e mak millaun $1,5 no simu osan  hosi Dotasaun Orsamentu Temporáriu (DOT) nian mak rihun $500. Entaun, nia dehan, ba fulan novembru-dezembru ne’e CNC husu de’it rihun $400.

Osan rihun $400 ne’e, nia haktuir, hodi utiliza ba programa inaugura memoriál ba portu Dili kona-ba memoriál invazaun Indonézia nian, prodúz livru inklui halo peskiza ba mapamentu ba fatin istóriku sira iha Timor-Leste.

“Osan rihun $400 ne’e ita hodi halo inaugura ba portu memoriál ba portu Dili no sei kompleta livru ne’ebé apoiu ba livru biografia saudozu Prezidente Francisco Xavier do Amaral nian be finaliza ona,” Hugo hateten. 

Aleinde ida-ne’e, Hugo hateten, CNC mós sei prodús tan livru suku haat (4) iha Munisípiu Dili nian kona-ba “Ema Ida Istória ida”.

“Ita mós sei prodús livru haat hosi suku haat nian kona-ba sira-nia istória. No, halo mós programa kona-ba maioria liga peskiza mapamentu iha territóriu Timor-Leste. Maibé tuir loloos ne’e suku ualu (8) maibé ita hakarak finaliza uluk suku-haat (4) de’it hanesan Colmera, Bairru-Pite, Motael no Comoro, tanba hela fulan rua deit ona,” nia dehan. 

Jornalista: Osória Marques

Editor: Cancio Ximenes

HAKEREK NO HATÁN

Please enter your comment!
Please enter your name here