Audisaun konjunta komisaun no Governu ba proposta OJE 2020 iha sala plenáriu, kuarta (24/09). Imajen Tatoli/Egas Cristovão

DILI, 23 setembru 2020 (TATOLI)-Iha ámbitu audiénsia públika konjunta komisaun iha Parlamentu Nasionál (PN) ho Governu, Banco Central Timor-Leste (BCTL) ne’ebé hanesan jestór ba fundu petrolíferu deklara balansu fundu to’o loron  31 agostu 2020 hamutuk biliaun $18,67.

Vise Governadór BCTL, Venâncio Maria Alves, informa desde hahú estabelese fundu petrolífera iha tinan 2005 to’o agora maizumenus hetan ona reseita hamutuk biliaun $23 hosi produsaun kampu petrolífera Bayu-Undan.

“Retornu investimentu akumuladu hosi tinan 2005 to’o 31 agostu 2020 hamutuk biliaun $6,9,” dehan Vise Governadór Banku Sentrál iha sala plenáriu, kuarta ne’e.

Jerente ne’e relata mós katak Governu hasai ona osan hamutuk biliaun $12, ne’ebé Banku Sentrál halo transferénsia ba konta Estadu hodi finansia despeza Orsamentu Jerál Estadu (OJE) no pedidu levantamentu estraordinária.

“Tinan 2020 BCTL transfere ona millaun $419 ba konta Estadu tuir pedidu levantamentu estraordinária dala-rua hosi Governu,” nia akresenta.

Notísia Relevante: Fundu mina-rai trimestre daruak sa’e ba biliaun $18,07

Nia adianta, retornu fundu petrolíferu bainhira tau ba persentajen hahú tinan 2005 to’o agostu 2020 hamutuk porsentu 4,2

“Kuaze tinan 15 to’o 16 nia laran ita hetan retornu pozitivu no tinan rua de’it (2015 ho 2018 ) maka ita hetan retornu negativu, entaun lala’ok fundu kada tinan hatudu retornu pozitivu mak barak liu, maibé ita labele espera katak pozitivu to’o fin tanba iha mundu investimentu bele mós akontese negativu, ida ne’e normál iha merkadu finanseiru,” Venâncio fó hanoin.

BCTL aprezenta senáriu utilizasaun fundu petrolíferu

Perante membru PN sira, Banku Sentrál fó sai senáriu ne’ebé maka utiliza ba fundu petrolíferu nian.

Vise Governadór BCTL hateten, bazeia ba senáriu ne’ebé aprezenta iha proposta OJE 2020 hosi Ministériu Finansa (MF), bainhira Governu gasta biliaun $1,9 kada tinan maka iha tinan 2031 sei iha de’it millaun $218 iha fundu petrolíferu, reseita doméstika bele mantein kontribui porsentu 6,4 ne’ebé korresponde millaun $340 no karik porsentu 15 korresponde millaun $807.

“Iha proposta OJE 2020 hatudu senáriu levantamentu fundu petrolíferu ninia sustentabilidade pelu menus tuir analiza projesaun Ministériu Finansa to’o tinan 2034, ita-nia fundu soberanu ne’e laiha ona. Tuir senáriu ne’e Ministériu Finansa prevee reseita doméstika foin mak atinje millaun $500-resin, maski Banku Sentrál iha senáriu balun,” nia hatutan.

Senáriu hosi BCTL maka ba senáriu dahuluk, karik disiplina mantein iha Rendimentu Sustentável Estimadu (RSE) ne’ebé tinan ida prevee millaun $544,4, maizumenus to’o tinan 2040 fundu petrolíferu iha balansu ne’ebé atinje biliaun $21,7.

Senáriu daruak maka bainhira gasta biliaun $1,2 kada tinan, maizumenus iha tinan 2039 ne’e fundu ninia balansu sei hela ho millaun $966.

“Ida-ne’e bainhira reseita doméstika mantein porsentu 6,5 hanesan iha proposta orsamentu, tanba kestaun lubuk ida ne’ebé kontribui projesaun kresimentu ekonómiku tinan ne’e tun porsentu 9,5 no mantein porsentu 6,5, entaun iha 2039 reseita doméstika bainhira asume porsentu 6,5 foin mak atinje millaun $574,” nia dehan.

Iha mós presupostu balun hosi Governu ne’ebé aprezenta regra fiskál ne’ebé haree ba sustentabilidade, asume karik mantein porsentu 15, entaun tinan 2039 bele atinje reseita doméstika biliaun $2,4.

Senáriu datoluk, karik gasta orsamentu biliaun $1,4 to’o 2036 balansu fundu sei mantein millaun $244, no reseita doméstika foin atinje millaun $475, karik bele asume porsentu 15 kresimentu reseita doméstika, entaun tinan 2036 hetan biliaun $1,6.

Senáriu dahaat maka, karik gasta biliaun $1,6, entaun iha tinan 2033 prevee katak fundu sei hela pelu menus billaun $1,06, reseita doméstika iha tinan 2033 foin mak atinje millaun $369 ho presupostu porsentu 6,4 maibé bainhira porsentu 15 maka balansu bele atinje biliaun $1,06.

“Senáriu ne’ebé Ministériu Finansa aprezenta iha livru orsamentu no Banku Sentrál aprezenta iha Parlamentu, ho prezunsaun asume retornu fundu petrolíferu porsentu tolu reál to’o utilizasaun OJE iha tinan nia rohan maka hasai porsentu 100 hosi fundu, maibé iha prátika tinan balun ita la hasai fundu tuir OJE ne’ebé aprova, ne’ebé retornu fundu asume porsentu tolu sura desde tinan 2005 to’o 21 agostu 2020 iha retornu média maka foti kada tinan, hafoin foti liña media maizumenus porsentu haat,” nia subliña.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here