Embaixadór Indonézia mai Timor-Leste, Sahat Sitorus. Imajen Tatoli/Egas Cristóvão

DILI, 22 setembru 2020 (TATOLI)- Governu Indonézia liuhusi sira-nia Embaixada iha Timor-Leste husu ba Timor-oan sira no ema hotu atu evita halo viajen ilegál tama-sai Timor-Leste liuhusi fronteira terrestre tanba bele lori COVID-19 mai Timor-Leste.

Notísia Relevante : UPF, EUP ho F-FDTL detein membru PSHT na’in-43

Embaixadór Indonézia mai Timor-Leste, Sahat Sitorus, rekoñese iha fulan agostu too setembru, nia akompaña informasaun iha membru arte marsiál husi Persaudaraan Setia Hati Terate (PSHT) halo viajen ilegál tama Indonézia liuhusi dalan ilegál iha tempu kalan-boot bele lori moras COVID-19.

“Viajen ilegál barak halo ita ta’uk tebes no ameasa boot, tanba mezmu ita nia seguransa sira metin, maibé la konsege halo pasa revista ba ema sira-ne’e mezmu mai husi Indonézia no husi Timor-Leste ba Indonézia,” dehan Embaixadór Sahat Sitorus, ba jornalista, ohin, iha Otél JL-Vila, Fatuhada, Dili.

Nia dehan, Indonézia prontu koopera nafatin ho Governu Timor-Leste no autoridade seguransa hodi halo patrullamentu maka’as iha fronteira terrestre no tasi nian.

“Mai ita servisu hamutuk hodi halo kontrolu, tanba COVID-19 ne’e perigu tebes, tanba kazu ida de’it mosu bele hamosu problema boot iha munisípiu ida ka rua,” Sahat Sitorus preokupa.

Embaixadór Indonézia rekomenda membru PSHT sira atu rejista aan legál iha Komisaun Regulariza Artes Marsiais (KRAM) hodi Governu legaliza sira nia atividade ho legál.

Embaixadór Sahat Sitorus rekoñese esforsu Estadu Timor-Leste luta kontra surtu COVID-19 halo Timor-Leste livre husi zero mortalidade COVID-19.

“Parabéns ba Timor-Leste nia esforsu hodi luta hasoru COVID-19 nu’udar susesu ida ho kooperasaun seguransa, parte Ministériu Saúde no povu rasik,” nia hateten.

Nia dehan, COVID-19 ne’ebé ataka mundu tomak dezde tinan 2019 liubá halo atividade ekonomia globál paradu.  Too ohin loron, tuir relatóriu Organizasaun Saúde Mundiál (OSM) rejista vítima ne’ebé sofre COVID-19 iha mundu hamutuk, 198.349,  na’in 19, 7.980 maka mate ona  no 82.763  rekuperadu.

Governu Timor-Leste nu’udar nasaun ida ne’ebé baliza ho fronteira nasaun viziñu Provínsia Nusa Tenggara Timur (NTT), Indonézia, sei konsidera zona livre, maibé presiza halo prevensaun nafatin ba COVID-19.

Antes ne’e, Vise Ministru Interiór, António Armindo hamutuk ho Komandante Jerál Polísia Nasionál Timor-Leste (PNTL) Komisáriu Faustino da Costa, hala’o enkontru ho lider PSHT hodi husu kooperasaun alerta ba membru sira evita halo viajen ilegál ba Atambua evita COVID-19.

Nia dehan, Governu lamenta, mezmu TL iha sitasaun Estadu Emerjénsia, maibé lideransa másimu PSHT ho estrutura tomak la tau atensaun ba membru hodi halo infiltrasaun liuhusi dalan ilegál ba Indonézia.

Prezidente PSHT, Baltazar Lemos Seixas deklara, membru sira viajen ba Indonézia la hetan autorizasaun husi lideransa sira.

“Durante ne’e ami fó sai ona iha fulan hirak liubá atu membru sira labele ba iha sorin. Maibé ema sira ne’e ladún kumpre, sira ba indivíduu no ami la autoriza sira ba iha sorin (Atambua, red),” dehan Baltazar.

Notísia Relevante : Prezidente PSHT TL husu membru sira tama kuarentena obrigatóriu

Nia husu ba membru PSHT hotu ne’ebé foin lalais ultra pasa fronteira hodi sa’e sintu iha Indonézia atu koopera ho seguransa hodi tama konfinamentu obrigatóriu ba prevene transmisaun surtu COVID-19 iha Timor-Leste.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here