Rádiu Streaming. Imajen/Espesiál

DILI, 25 setembru 2020 (TATOLI)-Sekretaria Estadu Komunikasaun Sosiál (SEKOMS) iha polítika atu moderniza rádiu komunidade sira hotu iha territóriu Timor-Leste hodi transmite informasaun liuhosi plataforma online (streaming).

“Iha tinan ne’e, rádiu komunidade 16 sei utiliza streaming hodi divulga informasaun, ne’ebé ninia preparasaun atinje ona porsentu 70,” dehan Sekretaria Estadu Komunikasaun Sosiál, Mericio Juinal dos Reis ‘Akara’, liuhosi nota ne’ebé Agência Tatoli asesu iha sesta ne’e.

Governante ne’e dehan, daudaun tékniku SEKOMS hahú fó formasaun ba profisionál komunikasaun sosiál sira iha rádiu komunidade hodi adapta ho plataforma dijitál ho ligasaun internet tanba durante ne’e sira uza de’it mídia konvensionál hodi halo publikasaun ba informasaun.

Notísia Relevante: Governu Lansa Rádiu Streaming Online ba Rádiu Komunidade 14

“Durante ne’e ita-nia mídia no jornalista sira toman ona ho mídia konvensionál ne’ebé mak manuál. Entaun bainhira ita introdús teknolojia foun ho plataforma dijitál, sira presija adapta-an no aprende oinsá halo operasaun iha plataforma online,” nia akresenta.

Nia nota katak, preokupasaun profisionál komunikasaun sosiál sira durante ne’e maka presiza hetan formasaun foun kona-ba halo operasaun ba mídia dijitál, tanba ne’e liuhosi Diresaun Nasionál Dezenvolvimentu Mídia Munisípiu SEKOMS hahú fó formasaun.

Membru ezekutivu ne’e apresia servisu pesoál rádiu komunidade sira tanba maski hasoru difikuldade no limitasaun oioin maibé kontinua garante ezisténsia.

Governante ne’e  kompromete sei kontinua fó apoiu finanseiru ba rádiu komunidade sira hodi asegura funsionamentu servisu.

Nia mós  apela ba jestór rádiu komunidade sira atu kontinua tuir formasaun sira hodi aumenta kapasidade, nune’e bele sai jestór di’ak atu hala’o knaar ho transparente no akontantabilidade.

Antes ne’e, SEKOMS deklara liuhosi plataforma dijitál bele moderniza programa diseminasaun informasaun ba públiku ho fásil no lais kompara ho tempu uluk ne’ebé uza mídia konvensionál ne’ebé presiza tempu naruk atu halo publikasaun.

Liuhosi koordenasaun ho mídia estatál sira hanesan Rádiu Televizaun Timor-Leste, Empreza Públika (RTTL,E.P) bele diversifikasaun meiu komunikasaun iha munisípiu sira nune’e bele adapta mós ho era dijitál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here