Sosiedade artístika Timor-Leste ejize Parlamentu Nasionál. Imajen TATOLI/Evaristo Soares Martins.

DILI, 22 setembru 2020 (TATOLI)—Sosiedade artístika Timor-Leste ejize Parlamentu Nasionál atu halo re-abertura ba lei propriedade nune’e fó protesaun ba direitu autór sira.

Tanba Konstituisaun RDTL artigu 60 (propriedade intelektuál) fó dalan, Estadu garante no fó protesaun ba hamoris, produsaun no hala’o fila-liman ho obra literáriu, sientífiku no artístiku ninian, no mós fó protesaun ba direitu autór sira-nian.

Ohin, organizasaun grupu artístika komposta hosi Almamor, autór poeta no sosiedade artísitka iha Timor-Leste hasoru malu ho Bankada FRETILIN no Komisaun F iha Parlamentu Nasionál, hodi husu tau konsiderasaun ba projetu-lei propriedade intelektuál.

Konselleiru ba Grupu Artístiku, Eládio Faculto, hasoru malu ho Xefe Bankada FRETILIN Deputadu Francisco Miranda Branco hodi fó konsiderasaun ba valór artístiku sira ne’e.

“Ami hamutuk ho organizasaun artísitika hosi Almamor, poeta, hotu-hotu mai iha-ne’e hodi hato’o kona-ba artísitiku nia vida iha futuru. Iha-ne’e haree liu kona-ba direitu autór ba lei propriedade intelektuál nian tanba artístiku Timor-Leste hanesan sosiedade ida-ne’ebé presiza atensaun hosi Estadu. Lejizladór sira tenke fó konsiderasaun boot ba asuntu ne’e,” Eládio Faculto informa ba jornalista sira hafoin hasoru malu ho Xefe Bankada FRETILIN, iha Parlamentu Nasionál, tersa ne’e.

Eládio Faculto uluk hanesan deputadu mak inisitiva ne’e liuhosi Komisaun F tanba komisaun refere uluk tutela ba asuntu kultura, juventude no desportu.

Razaun Eládio Faculto hola inisiativa ne’e tanba sosiedade artístiku iha Timor-Leste tenke hetan apoia maka’as Estadu liuliu haree kona-ba lei ida, polítika ida no mós haree orsamentu ida ba organizasaun artístika sira.

“Ohin, Prezidente bankada FRETILIN hatete ba ami katak bankada FRETILIN sente katak artístiku Timor-Leste moris marjinalizadu. Nia fó ezemplu de’it kuandu artista Timor-Leste bainhira hetan tratamentu iha selebrasaun sira, artista Timor-Leste ne’e hetan tratamentu ladún di’ak no artista hosi rai-li’ur mai fó konsiderasaun boot liu,” Eládio Faculto hateten.

Eládio Faculto hatutan, problema  seluk mak tais hanesan patrimóniu kulturál nian, múzika no grupu artísitka sira seluk. Nia fó ezemplu, tais balun hosi Oé-Cusse neste momentu ema Indonézia mak uza hosi parte Atambua no Kupaun.

Notísia Relevante: 2021, UNESCO Rekoñese Tais Timor Nu’udar Patrimóniu TL

“Ne’e preokupasaun. Se lei ne’e laiha ita atu ko’alia saida. Aban bainrua ema ba rejista tiha iha UNESCO ne’ebá kona-ba patrimóniu ita-nian entaun ita atu ba insiste ho saida, se ita rasik laiha lei ida para atu regulariza,” nia dehan.

Nia dehan, loloos ne’e Governu tau-matan ba problema sira-ne’e hotu, nune’e lei ne’e bele regulariza patrimóniu kulturál sira.

“Ne’e mak ohin ha’u mai halo parte hamutuk ho sira hodi ejize re-abertura ba lei ne’e. Se mak asume kna’ar atu halo re-abertura ne’e só parlamentu de’it maibé Bankada FRETILIN totalmente fó apoia, laiha rezerva uitoan,” nia hateten.

Konselleiru Artístika Timor-Leste ne’e fó ezemplu, artista timoroan sira laiha fronteira polítiku, artista hananu iha fatin hotu-hotu tanba ne’e tenke iha lei hodi regulariza.

Hafoin hasoru malu ho Bankada FRETILIN, hasoru mós Komisaun F no bankada parlamentár sira seluk iha Parlamentu Nasionál.

Iha fatin hanesan Prezidente Almamor, Henrique de Rosário, preokuapdu tanba durante ne’e Governu fakar osan ba desportu iha rai-li’ur maibé artista sira-ne’ebé hamorin Timor-Leste nia naran, Governu la tau-matan.

“Almamor hanesan sosiedade ketak ida tanba lei propriedade intelektuál ne’e mós ko’alia kona-ba múzika iha laran. Tan ne’e ami fó hanoin ba Governu durante ne’e fakar osan ba desportu barak liu ba rai-li’ur, agora artista sira liuhosi Maria Vitoria hamorin Timor-Leste nia naran maibé fakar osan uitoan de’it. Artista sira Governu la valoriza,” nia dehan.

Entretantu iha artigu 1223 Kódigu Sivíl fo dalan atu kria lei espesifiku ida hodi regula kona-ba direitu propriedade intelektuál neé, maibe banhira Timor Leste seidauk iha lei rasik,Timor Leste sei aplika lei anterior (Lei Indonézia nia) no tuir regulamentu UNTAET no 1./1999.

Nune’e mós artigu 303 Kódigu Penál ne’ebé ko’alia liu kona-ba falsifikasaun, mak Timor-Leste seidauk hatuur loloos falsifikasaun iha propriedade intelektuál nian, Tribunal labele halo interpretasaun paralela ka interpretasaun legál seluk bainhira ema ida halo duni falsifikasaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here