Sekretáriu Estadu Protesaun Sivíl (SEPS), Joaquim José Gusmão dos Reis Martins. Imajen Tatoli/Dok.

DILI, 22 setembru 2020 (TATOLI)-Sekretáriu Estadu Pretensaun Sivíl (SEPS), Joaquim José Gusmão dos Reis Martins, lori oitavu Governu nia naran hato’o agradese ba parseiru estratéjiku sira; korpu diplomátiku, ajénsia Nasoins Unidas, Ajénsia Internasionál no parseiru nasionál ne’ebé durante ne’e fó ona apoiu ba SEPS.

Notísia Relevante : SEPS ho parseiru sira ko’alia kooperasaun iha area protesaun sivíl

Joaquin Gusmão hateten, durante ne’e SEPS hetan apoiu lubuk husi parseiru sira barak, liu-liu iha area kapasitasaun ba  treinamentu pesoál  Bombeiru hanesan iha Tailándia, Malázia, Indonézia no seluk tan.

Nia dehan, apoiu mós  umanitária emerjénsia iha dezastre naturaís, hanesan hahán no materiál konstrusaun hodi tulun komunidade sira ne’ebé afeta husi dezastre naturaís.

“Ha’u labele temi parseiru hotu, maibé hanesan Oxfam, Caritas, Care Internasional, IOM no sira seluk durante ne’e apoiu maka’as tebes ba ita,” hateten Joaquin Gusmão, ohin,  hodi responde Agência Tatoli iha ámbitu enkontru ho parseiru sira iha hotel JL. Vila, Fatuhada, Dili.

Iha  tersa ne’e, SEPS hala’o enkontru ho korpu diplomátiku  sira iha Timor-Leste hanesan Embaixada Uniaun Europeia, Embaixada Portugal, Embaixada Austrália, Embaixada Indonézia, Embaixada Tailándia, Embaixada Nova Zelándia, Embaixada Japaun, Embaixada Repúblika Popular Xina, Embaixada Korea ho Embaixada Estadu Unidu Amerika.

Parseiru ajénsia internasionál ne’ebé hola parte mós iha sorumutuk importante ne’e hanesan USAID, Care Internasionál, Oxfam, Plan Internasional, Cruz Vermelha Timor-Leste, Organizasaun Mundiál Saúde  (WHO), IOM, Unicef, Word Vision, Mercy Corps, UN Women no mós parseiru nasionál sira seluk.

Nia husu ba parseiru sira karik akontese dezastre naturaís ruma, parte Governu prontu servisu hamutuk ho parseiru sira hodi responde vítima sira ne’ebé afetadu husi dezastre naturaís.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here