Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 22 setembru 2020 (TATOLI)-Iha reniaun Komité Revizaun Orsamentu Polítika (KROP) ba Ministériu Obra Públika (MOP) ba tinan 2021, husu orsamentu adisionál hamutuk millaun $4,8 hosi tetu inisiál millaun $176.

Ministru obra Públika, Salvador Eugênio Soares dos Reis Pires, hateten orsamentu adisionál ne’e atu  finansia ba reforma insitutsionál liuliu orsamenta ba Eletricidada de Timor-Leste (EDTL,E.P) ba empreza públika no Autoridade Nasionál Eletrisidade (ANE) inklui Água de Timor-Leste, empreza públika no Autoridade Nasionál Água no Saneamentu (ANAS).

“Ami prepara orsamentu ne’ebé iha adisionál husu Millaun $1,3 ba Água de Timor-Leste no ANAS no millaun $3,5 ba EDTL,E.P,” tenik Ministru Salvador iha edifísiu Ministériu Finansa, Aitarak-laran, tersa ne’e.

Totál pakote tetu fiskál 2021 ne’ebé MOP simu millaun $176 inklui mós pakote rekuperasaun ekonómika millaun $21 ne’ebé barak liu aloka ba saneamentu báziku, liuliu halo lavandaria (toilet public) iha munisípiu tomak no mós ba drenajen iha Dili no halo estudu ba koverte sistema kombustível ba óleu pezadu ba gás naturál.

Tuir Governante ne’e, pakote fiskál ne’e la inklui kapitál dezenvolvimentu, nune’e  MOP hatama proposta sia atu halo diskusaun iha Komisaun Administrasaun Fundu Infaestrutura (KAFI).

“Ami aprezenta mós nia valór, maibé ami husu de’it atu orsamenta porsentu 20 hosi orsamentu ne’ebé mak iha tanba ita presiza halo investimentu iha tempu sertu mak iha 2021,” nia akresenta.

Iha 2021, MOP hakarak  uza orsamentu Estadu atu halo investimentu tuir nia programa kada tinan, hanesan pakote eletrisidade 33 hodi bele rezolve fazeadamente suku 77 seidauk asesu liña elétrika, iha área bee atu liberta postu administrativu 41 ba sistema bee urbana, manutensaun estrada rurál ne’ebé estabelesidu ona no mós reabilitasaun foun hamutuk pakote 45, estrada munisipál pakote 12 no ponte  pakote 10.

Ba proposta sia ne’e, KROP aprova hotu lista projetu sira no sei halo ajustamentu hosi ekipa tékniku sira atu aprezenta iha KAFI, molok aprezenta fali ba KROP prinsipál ne’ebé lidera hosi Primeiru Ministru, Taur Matan Ruak.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here