Reuniaun KROP loron daruak ba proposta OJE 2021, iha salaun Ministériu Finansa, Aitarak-laran, tersa (22/09). Imajen Tatoli/Egas Cristovão

DILI, 22 setembru 2020 (TATOLI)-Reuniaun Komité Revizaun Orsamentu Polítika (KROP) iha loron daruak ba setór sosiál nian hamosu proposta adisionál ho totál millaun $14.

Setór sosiál prezide hosi Vise Primeiru-Ministru (PM) no Ministra Solidariedade Sosiál no Inkluzaun (MSSI), Armanda Berta dos Santos.

“Iha Komité Revizaun Orsamentu Polítika nian durante loron rua ne’e, orsamentu adisionál hamutuk millaun $14,” relata Vise-PM, Armanda Berta hafoin prezide KROP iha salaun Ministériu Finansa, Aitarak-laran, tersa ne’e.

Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos. Imajen Tatoli/Egas Cristovão

Proposta adisionál sira ne’e mai hosi Ministériu Edukasaun, Juventude no Desportu (MEJD), Ministériu Saúde (MS), Ministériu Ensinu Superiór, Siénsia no Kultura (MESS) no Ministra Solidariedade Sosiál no Inkluzaun (MSSI) rasik.

“Sira husu orsamentu adisionál tanba iha programa importante atu tau tan orsamentu, maibé ne’e seidauk ramata no setór ne’e sei ramata iha loron 28 setembru,” nia akresenta.

Maski hamosu proposta adisionál maibé seidauk iha rezultadu ikus no sei diskute hamutuk ho Primeiru-Ministru, Taur Matan Ruak, no Vise PM no Ministru Planu no Ordenamentu, José Maria dos Reis.

Durante diskusaun KROP ministériu maioria husu orsamentu adisionál ho montante ladún boot.

Enkuantu iha setór sosiál sei hela Ministériu Asuntu Kombatete no Libertasaun Nasionál no Sekretáriu Estadu Igualdade no Inkluzaun maka seidauk aprezenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here