Prezidente Tribunál Rekursu, Deolindo dos Santos. Imajen Tatoli/Egas Cristovão

DILI 22 setembru 2020 (TATOLI)-Iha reuniaun Komité Revizaun Orsamentu Politíka (KROP) ba loron daruak nian, Tribunál Rekursu (TR) husu orsamentu adisionál millaun $5-resin, hosi tetu inisiál millaun $6-resin.

Prezidente Tribunáll Rekursu (PTR), Deolindo dos Santos, hateten razaun husu tan adisionál tanba orsamentu ne’ebé maka Ministériu Finansa (MF) fó la to’o atu kobre ba atividade Tribunál sira ne’ebé sei hala’o iha tinan 2021.

“Ha’u ho ekipa Tribunál Rekursu mai halo aprezentasaun orsamentu 2021 nian, ne’ebé maka Ministériu Finansa distribui pakote orsamentu ba Tribunál sira hotu millaun $6-resin, nune’e orsamentu ne’ebé ami halo aprezentasaun iha Komité Revizaun Orsamentu Politíka ho totál millaun $11-resin,” dehan PTR, hafoin partisipa iha reuniaun KROP iha salaun MF, Aitarak-laran, tersa ne’e.

Hafoin simu pakote orsamentu no halo diskusaun kle’an, haree katak orsamentu la to’o, entaun halo tan pedidu adisionál hodi reforsa serbisu Tribunál.

“Orsamentu ne’ebé prevee iha 2021 sei la halo buat foun, maibé kontinua buat sira antes prevee ona iha orsamentu 2020, tanba osan la aprovadu maka ami lori fali planu hirak ne’e tau iha orsamentu tinan oin atubele realiza,” nia akresenta.

Antes ne’e, TR tau ona prioridade atu loke tan Tribunál Distritál iha munisípiu tolu, hanesan Viqueque, Ermera no Bobonaro, nune’e atu lori justisa hakbesik ba povu ho forma ne’ebé permanente no iha tempu hanesan bele redús kustu orsamentu  operasionál ne’ebé durante ne’e uza ba iha funsionamentu Tribunál movel ho kustu boot.

Munisípiu tolu ne’e iha ona delegasaun Ministériu Públiku (MP) no Defensór Públiku nune’e bele fasilita servisu.

Nune’e mós bainhira haree ba estatístika, prosesu kazu ne’ebé iha munisípiu tolu ne’e rejista númeru aas.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here