iklan

HEADLINE, POLÍTIKA

PLP apoia ideia FRETILIN re-avalia PEDN

PLP apoia ideia FRETILIN re-avalia PEDN

Vise Xefe Bankada Parlamentár PLP, Francisco de Vasconcelos. Imajen/ Egas Cristovao.

DILI, 22 setembru 2020 (TATOLI)—Bankada Partido Libertação popular (PLP) apoia ideia bankada Frente Revolussionária de Timor-Leste independente (FRETILIN) atu re-avalia Planu Estratéjiku Dezenvolvimentu Nasionál (PEDN) tanba 2030 besik ona.

Notísia Relevante: Arão Noé husu rekupera ekonomia nasionál la’ós re-avalia PEDN

“Bíblia mak labele muda. PEDN ne’e barak mak seidauk atinje meta sira, ne’ebé bainhira dehan re-avalia ka halo alterasaun ruma ne’e atu halo ajustamentu ba ita-nia situasaun reál ami apoia,” Vise-Xefe Bankada PLP Deputadu, Francisco de Vasconcelos, informa ba jornalista sira, iha resintu Parlamentu Nasionál, segunda ne’e.

Deputadu Francisco de Vasconcelos lee hotu ona PEDN ne’e hahú hosi kapítulu I to’o VI maibé meta ka objetivu hosi planu refere barak mak la atinje entaun tenke halo alterasaun hodi halo ajustamentu.

“Presiza halo ajustamentu katak presiza halo alterasaun ba buat ruma. PEDN ne’e la’ós konstituisaun, ne’ebé se ita haree uluk boot liu entaun ita haree ita kiik ne’e hodi rezolve. Kuandu halo alterasaun hodi halo ajustamentu ami apoia,”  nia dehan.

Nia fundamenta, hahú hosi 2017, 2018, 2019 no 2020 la halo buat ida no 2030 hela de’it tinan 10, tanba ne’e presiza halo altersaun.

“PEDN ne’e iha tiha ona mós ita la halo buat ruma. Loloos ne’e sira halo buat ruma iha 2015, sira halo fali saida mak ne’e karik,” nia hateten.

Maske nune’e, Vise-Xefe Bankada PLP ne’e fó-sai katak iha PEDN ne’e planu mesak furak de’it maibé problema iha ema ne’ebé implementa planu ne’e.

“Problema ne’e iha ema. Ó hakarak halai lalais ne’e problema iha-ne’e. Sira dehan PEDN 2020-2030 mós hanesan kanta de’it,” Vise-Xefe Bankada PLP ne’e hateten.

Jornalista: Evaristo Soares Martins

Editór: Cancio Ximenes

iklan
iklan

Leave a Reply

iklan
error: Content is protected !!