Hakerek nain, Rafael Belo.

Hosi:

Rafael Ximenes de A. Belo

Antesidénsia

Lia-bosok (hoax) no lia-falsu (fake) antonimu ba lia-tebes, lia-loos. Lia-bosok, lia-falsu, ohin loron sai ona “adversáriu” ida ba lia-loos ka verdade iha interasaun entre ema iha sosiedade kontamporanea, iha vida profisionál inklui mós vida polítika liuhusi informasaun sira ne’ebé mak espalla iha rede sosiál sira ka plataforma internét nian. Bainhira la kombate sedu mak sei implika direta no indireta iha selula kognitivu, psikomotoriku no afetivu vida umana tanba prezensa internét.

Lia-bosok (hoax) no lia-falsu (fake) sai “inimigu” foun ida ba ita iha périodu sibernetika ne’e. Hoax no fake news (notísia), iha kada segundu no minutu sirkula maka’as hodi kompete ho lia-loos no informasaun kredivel sira. Velosidade sirkulasaun hoax no fake ne’e mós iha kapasidade ultrapasa fronteira terrestre no mós áerea, ne’ebé bele hamosu “misinformation” no “misunderstanding” ka sala informasaun no sala kumprende iha prosesu komunikasaun ema nian to’o bele hamosu feedback ka efeitu ne’ebé desperadu tuir objetivu komunikasaun.

Loos duni prezensa internét fasilita tebes nesesidade ita nian hanesan komunikasaun, atividade negosiu, serbisu, estudu no seluktan. Produtu internét sai ona konsumu públiku. Ne’e katak internét iha benefísiu tebes ba ema no moris bainhira utiliza ho maneira pozitiva, ho efisiénsia no mós efetivu. Maibé, opostu ba aspeitu sira ne’e bele fó konsekuénsia rasik mós ba ita ema hanesan utilizadór ba internét liuhusi meiu sira ne’ebé internét rasik iha hanesan rede (sosiál).

Internet, atualmente, bele utiliza la’ós de’it iha desktop ka laptop maibé via mós telefone (smartphone) basta iha saldu, iha sim card ne’ebé rejistadu iha empreza telekomunikasaun sira ne’ebé hala’o sira-nia atividade iha Timor-Leste, ka parte seluk iha mundu, bainhira ita iha no hela bá (jeografia).

Tuir dadus ANC (Autoridade Nacional Comunicação) katak iha loron 30 setembru 2019, operadór tolu hanesan Timor Telecom, Telemor no Telcomcel nia totál kliente ne’ebé ativu (sim card rejistadu) bazea ba dadus atualizadu ne’ebé ANC iha hamutuk 1.442.497 (notísia TATOLI, 4 novembru 2019). Iha parte seluk bazea ba dadus Internet World Stats (Usage and Population Statistics) husi totál nasaun sira iha mundu, iha rejiaun Ázia, Timor-Leste husi totál populasaun maizmenus ema na’in 1.318.445 totál uzuáriu internét hamutuk maizmenus 410,000 durante maiu 2020. Husi númeru ne’e utilizadór Facebook hamutuk 390.000

Enkuantu, nafatin tuir dadus Internet World Stats (Usage and Population Statistics), utilizadór internét sira iha mundu inkluzivamente Timor-Leste, utilizadór internét sira maioria uza Facebook (99,38%), Youtube (0,18%), Twitter (0,1%), Pinterest (0,32%), Instagram (0,03%) no Linkedin (0%) esklui Google no Whatsapp iha plataforma hotu (telefone, desktop no tablet) iha fulan agostu 2020 nia laran.

Bainhira halo klasifikasaun ba plataforma tolu iha leten, iha Telefone, uzuáriu Facebook (99,5%), Youtube (0,12%), Twitter (0,09%), Pinterest (0,026%), Instagram (0,02%) no Linkedin (0%). Iha Desktop, uzuáriu Facebook (96,93%), Youtube (1,36%), Twitter (0,18%), Pinterest (1,4%), Instagram (0,05%) no Linkedin (0,05%). Iha parte Tablet nian, uzuáriu Facebook ne’e hamutuk 100% la inklui Youtube, Twitter, Pinterest, Instagram no Linkedin.

Bazea ba parsentajen no dadus númeriku sira ne’e ita bele nota katak utilizadór internét sira iha Timor-Leste barak liu mak uza rede sosiál Facebook depois mak meiu komunikasaun sira seluk. Husi utilizadór sira ne’e, hanesan ita hotu akompaña husi loron ba loron balun kria ho identidade loloos no balun lae hodi hamosu lia-bosok no lia-falsu sira ne’ebé bele iha impaktu direta no indireta ba ita idaidak iha vida sosiál no kultura, ekonomia no seluktan iha sosiedade alende notísia ka informasaun la loos sira ne’ebé espalla iha internét, ho dimensaun oioin husi komunidade mundiál.

Tanba ne’e, ema hotu ho kamada oioin iha sosiedade mundiál inklui Timor-Leste nesesita halo ezersísiu koletivu ka individu regularmente hodi kombate no prevene hoax no fake (news), hodi kontribui ba sosiedade informadu ida ho internét saudável no seguru.

Iha Timor-Leste, hanesan ita hotu akompaña, iha sesta (18/09/2020) governu liuhusi Sekretáriu Estadu Komunikasaun Sosiál (SEKOMS) realiza kampaña hanesan “Kampaña Nasionál Kombate HOAX no Promove Internét Saudável” ho apoiu mós husi parseiru sira hanesan Sekretáriu Estadu Juventude no Desportu (SEJD), inklui operadora telekomunikasaun sira iha Timor-Leste (TL) hanesan Timor Telecom (TT), Telemor no Telcomcel nune’e mós órgaun patrosinadór sira seluk, nu’udar “sensibilizasaun” nasionál ida hodi konsensializa utilizadór internét sira oinsá “hakribi” lia-bosok (hoax) no lia-falsu (fake) ne’ebé sirkula iha plataforma informasaun sira iha internét.

Biar nune’e, efetividade husi kampaña nasionál ne’e mak oinsá sidadaun idaidaik ka individu ida bele uza kakutak ho rasionalidade, uza fuan ho konsiénsia hodi atua asaun ho responsabilidade kontribui informasaun rigoroza no verifikadu ho baze lia-loos iha nesesidade moris lorloron nian iha vida sosiál, kultura no seluktan iha Timor-Leste no iha mundu.

Enkuadramentu teóriku

Internét saudável (Internet healty) ka cyber healty nu’udar meiu oinsá ema asesu internét ba nesesidade moris nian ho responsável. Internét ne’ebé saudável iha posibilidade mós evita konteúdu pornográfiku sira, prekonseitu inklui ameasa sira alende hoax ka fake.

Haree ba konseitu, internét saudável kompostu husi liafuan rua; Internét no saudável. Internét, tuir Disionáriu Nasionál ba Tetun Ofisiál katak rede globál komputadór nian ne’ebé fó informasaun oioin no fasilidade komunikasaun nian (2005:344) no saudavel mai husi liafuan saúde ne’ebé signifika kondisaun bainhira ema, nia isin ka nia knaar ruma la’o didi’ak (2005:745).

Iha Oxford Advanced Learner’s Dictionary, internet ne’e katak: an international computer network connecting other networks an computer from other companies, universities, etc (2015:799). Healty (saudável) ne’e signifika: heaving good well and not likely to become ill/sick (2015:705).

Tuir Dicionário Infopedia.pt, internet ne’e: rede mundial de comunicação por computadores, de origem norte-americana, que permite aos seus utilizadores a troca de mensagens e o acesso a grande quantidade de informação (informática);  (internet das coisas) ne’e: conjunto dos aparelhos e objetos computorizados e ligados à internet, capazes de se identificarem na rede e de comunicar entre si.

Saúdavel ne’e katak: que é bom para a saúdesalutar, que tem saúderobustoforte, benéficoproveitoso.

 Husi esplikasaun sira kona-ba “internet” no “saudável” ne’e bele dehan katak koneksaun aparellu entre rede komputadór sira hodi halo komunikasaun (direta no indireta) ho di’ak husi individu ka grupu nu’udar utilizadór nune’e bele iha benefísiu mútua ka individualmente.

Nune’e, denonativamente no konotativamente, internet saudável ne’e signifika uza internet ho “didi’ak” ho “loloos”, tuir dalan, tuir regra, tuir mekanizmu alias uza ho “fuan” no “kakutak”. Katak, la uza internet hodi ofende individu ka grupu ida, la uza internet ba promove valór negativu (rasizmu, ódiu no vingansa, bosok, kria eh hamosu boatu ka rumór sira no seluktan) maibé utiliza internet ho didi’ak ba benefísiu no nesesidade pesoál, grupu, organizasaun no aspetu seluk tan iha eskala oioin.

Tanba ne’e, tuir hakerek-na’in, atu to’o iha faze ida ne’e ho efetivu no efikás, ema hotu, la haree ba jéneru, idade, profisaun ka estatutu sosiál, ne’ebé utiliza internet diariamente ka lae, asume responsabilidade, promove étika tuir norma sira ne’ebé mak vigora hodi kontribui ba armónia sosiál iha área informasaun, tantu iha browsing (navegasaun eh peskiza), chatting (konversa ka ko’alia ba malu), download  (baixar) no upload  (karrega), iha interrasaun entre ema nian iha vida umana.

Dikas balun ba promove internét saudável

Iha ema barak, eziste péritu oioin, hodi hato’o sira-nia perspetiva no aprezenta hanoin diversu kona-ba oinsá promove Internét saudável. Maibé, husi perspetiva no hanoin oioin ne’ebé mak iha, liuhusi artigu simples ida ne’e, hakerek-na’in aprezenta pontu importante lima kona-ba oinsá promove Internét saudável, hanesan tuirmai:

Konteúdu informasaun ne’ebé ita asesu presiza verifika nia verasidade molok partilla no públika;

  • La kria eh prodús informasaun ne’ebé la akuradu, klareza, izenta no rigór hodi dezvia ema seluk nia hanoin, sentimentu no emosaun kona-ba realidade, objetu ka fenómenu ruma iha sosiedade ka moris;
  • Bainhira hala’o atividade browsing, chatting, download no upload kualker konteúdu, tantu multimedia no multiplataforma iha internét liuhusi komputadór ka laptop eh smartphone ka gadget tenke ho efisiénsia no efikasia hodi promove kredibilidade informasaun nune’e bele kultiva no prezerva “internét saudável”;
  • Evita hahalok negativu maibé promove valór pozitivu hanesan étika, morál no respeita malu entre individu ka grupu hodi bele ajuda forma karakter nasaun no sidadaun sira nian ho otimizmu iha rede sosiál (facebook, whatsapp, twitter no seluktan), blogs ka portál sira;
  • Uza liberdade espresaun ho responsabilidade no integridade, dignifika ita lisan, tradisaun no valór komún sira ne’ebé ita adota no kompromete;

Kultiva no prezerva uzu internét saudavel, ita promove armónia sosiál. Sosiedade ne’ebé armónia sei hana’i komunikasaun saudável, promove lia-loos. Hateten lae ba lia-bosok no lia-falsu!”

BIBLIOGRAFIA

  1. Deuter, Margaret, et.all (2015). Oxford Advanced Learner’s Dictionary, ninth edition, p.705, 799.
  2. Guterres, Aderito, et.all (2005). Disionáriu Nasionál ba Tetun Ofisiál  edisaun dahuluk, p.344, 745.
  1. https://gs.statcounter.com/social-media-stats/all/timor-leste, asesu iha loron tersa (22/09/2020).
  2. https://www.infopedia.pt/dicionarios/lingua-portuguesa/internet, asesu iha loron tersa (22/09/2020).
  3. https://www.Internétworldstats.com/stats3.htm, asesu iha loron tersa (22/09/2020).
  4. tatoli.tl, asesu iha loron (22/09/2020).

(Alumni Departamentu Komunikasaun Sosiál, UNTL)

E-mail:rafael.enf009@gmail.com

Facebook: Rafy Belo ATL

Nota: Artigu opiniaun ne’e responsabilidade pesoál nu’udar sidadaun ida hodi ezerse nia direitu ba liberdade imprensa no ko’alia, ne’ebé konsagra mós iha Konstituisaun Repúblika Demokrátika Timor-Leste!

HAKEREK NO HATÁN

Please enter your comment!
Please enter your name here