Hakerek nain, Memensio Sequeira Freitas.

(Perspetiva pesoál kona-ba Dezenvolvimentu Setór Edukasaun iha Timor-Leste)

Hosi: Memensio Sequeira Freitas*)

Polítika no edukasaun kompara hanesan moeda ne’ebé iha ninia superfísie rua hodi kompleta malu. Polítika eziste atu proteje edukasaun, edukasaun fali iha atu orienta polítika. Problema bele mosu bainhira iha motivu no interese polítika domina ona edukasaun, uza meiu hotu-hotu polítika nian hodi sakrifika buat hotu-hotu inklui neutralidade edukasaun nian. Edukasaun, ikus mai la’ós ona sai pilár importante ba dezenvolvimentu maibé sai fali meiu atu implementa interese polítika partidu sira ne’ebé kaer ukun.

Molok hahú artigu simples ida-ne’e, ha’u hakarak husik hela pergunta reflesaun ida ba sani-na’in sira (ita hotu: membru Governu, profesór/a, estudante sira, no seluk tan) atu reflete; Edukasaun iha Timor-Leste ne’e sai hanesan investimentu ida ka sai de’it hanesan retórika polítika ida? Pergunta ida-ne’e ha’u koloka tanba ita-nia Estadu opta setór edukasaun nu’udar programa prioridade hamutuk ho setór sira seluk hanesan saúde no agrikultura. Enkuantu, durante besik dékada rua, sistema edukasaun sei kontinua hakdasak bainhira ita kanta hela “kualidade edukasaun” loro-loron hosi ema ua’in ba ua’in.

KRDTL liuhosi nia artigu 59 garante sidadaun hotu-hotu nia direitu atu asesu ba edukasan no bazea ba artigu ida-ne’e duni mak iha tinan 2008, liu hosi Lei nú. 14/2008 de 28 de outubru aprova Lei Base da Educação ne’ebé hatuur no vinkula kona-ba sistema edukasaun iha Timor-Leste. Artigu hirak ne’ebé hatuur iha Lei Baze refere klaru hela, maibé iha ninia implementasaun mak ita seidauk haree katak bele hamosu nia rezultadu di’ak ruma, enkuantu ita kontinua toka múzika kualidade edukasaun iha fatin ida ba fatin ida selu no fatin ida seluk ba fatin ida.

Aleinde ne’e, polítika públika kona-ba edukasaun iha Timor-Leste hatuur mós iha Planu Estratéjiku Dezenvolvimentu Nasionál (PEDN) 2011-2030. Rezolusaun Governu nú. 3/2007 sita iha ninia situasaun jerál, deskreve uituoan kona-ba polítika públika ba edukasaun. “O PEDN faz da educação um pilar fundamental da sua estratégia para reduzir a pobreza e desenvolver a nação. Prevê que até 2020 a população de Timor-Leste esteja bem instruída, saudável, altamente produtiva, auto-confiante, e adoptando os valores do patriotismo, não discriminação, e igualdade num contexto global”. Saida mak mosu? Ita iha ona 2020, ita kumpre ona buat sa’ida mak hatuur iha PEDN kona-ba edukasaun?

Definisaun kona-ba Edukasaun

Tuir Infopedia (Dicionário Porto Editora), edukasaun nia signifikadu mak “processo que visa o pleno desenvolvimento intelectual, físico e moral de um indivíduo (sobretudo na infância e na juventude) e a sua adequada inserção na sociedade” ka bele dehan processo, geralmente orientado por outrem, de aquisição de conhecimentos e aptidões; instrução, conjunto dos recursos dedicados à gestão do sistema escolar de um país, região, etc”.

Hosi definisaun tuir disionáriu iha leten, ita bele haree iha aspetu tolu mak sai pilár importante iha sistema edukasaun mak dezenvolvimentu intelektuál, fíziku no morál hosi ema ruma, katak ema hotu ne’ebé iha asesu ba edukasaun iha nível sira hotu no ninia insersaun (introdúz iha vida reál) iha sosiedade, atu la’ós de’it iha matenek maibé tenka iha morál ne’ebé di’ak mós.

Tuir Disionáriu Nasionál ba Tetun Ofisiál (2005, p. 142) defini edukasaun nu’udar: (1) Hanorin no estuda hamutuk, no (2) nu’udar modun-di’ak delikadeza. Nu’udar hanorin no estuda hamutuk, edukasaun katak prosesu ida iha ne’ebé iha enkontru entre manorin ho kanorin atu bele tranzmite siénsia no teknolojia, ne’ebé iha paradigma foun edukasaun ikus ne’e konsentra liu ba kanorin, enkuantu manorin sai de’it hanesan fasilitadór iha sala de aula.

Nu’udar modun-di’ak delikadeza, edukasaun la’ós de’it sai fonte ba tranzmite siénsia no teknolojia, maibé edukasaun sai mós hanesan meiu ida atu fó formasaun morál, nune’e ema ne’ebé asesu ba edukasaun bele sai ema edukadu. Katak matenek tanba simu tiha ona edukasaun. Ho ida-ne’e mak ita hanaran edukasaun nu’udar asaun edukativu tanba edukasaun ne’e rasik hanorin buat ne’ebé útil.

José Manuel Ruiz Calleja (2018 p. 109) define edukasaun nu’udar “ação que desenvolvemos sobre as pessoas que formam a sociedade, com o fim de capacitá-las de maneira integral, consiente, eficiente e eficaz, que lhes permita formar um valor dos conteúdos adquiridos, significando-os em vínculo direto com seu cotidiano, para atuar consequentemente a partir do processo educativo assimilado”.

Hosi ne’e, ita bele haree katak edukasaun nu’udar prosesu integradu ida-ne’ebé ema hetan iha ninia vida atu bele aplika mós iha ninia moris loro-loron nian. Tanba, ema hirak ne’ebé hetan formasaun edukativu ne’e mak sei forma sosiedade (hamutuk ho ema barak ne’ebé la’ós formadu), nune’e bele iha sosiedade ida kapasitadu, konsiente, efisiente no efikaz.

Edukasaun nu’udar Investimentu ida

Iha opiniaun globál koñesidu balun iha Indonézia hateten “Pendidikan bukanlah pabrik, namun investasi”. Liafuan ida ne’e merese atu ita reflete no konsiente atu bele hamoris no hamanas nafatin ita-nia intedimentu di’ak kona-ba oinsá edukasaun nia papél ba iha ezisténsia rekursu umanu nian iha futuru. Tanba á? Tanba, se ita hakarak kolleta batar iha futuru mak ita tenke kari ka kuda fini (semente ka musan) hahú agora!

Ita rona dala barak preokupasaun públiku nian, hahú kedas hosi ukun-na’in sira to’o povu baibain kbiit laek sira kona-ba prosesu edukasaun iha ita-nia rai doben Timor-Leste. Preokupasaun hirak ne’e pertinente atu ita diskute, tanba iha realidade, ita-nia sistema edukasaun kontinua la’o hakdasak. Kondisaun lubuk ida seidauk kria ho di’ak, embora kada tinan ita gasta biliaun ba biliaun.

Ida-ne’e bele akontese tanba bele mós polítika públika kona-ba edukasaun Timor-Leste mak seidauk di’ak ka tanba osan ne’ebé aloka ba setór edukasaun iha kada Orsamentu Jerál Estadu nian mak seidauk atinje montante ida adekuadu ka tanba implementasaun hosi polítika públika kona-ba edukasaun mak seidauk responde duni ba ejijénsia loloos.

Fasilidade infraestura bázika iha eskola bara-barak seidauk adekuadu tuir kondisaun edukasaun mundu ohin loron nian, enkuantu ita-nia ukun na’in sira ne’ebé tutela ba iha setór edukasaun kontinua halo kampaña no promesa rebo-rebo oinsá atu dezenvolve setór edukasaun. Ita-nia estudante barak seidauk iha kompeténsia akadémika ida di’ak enkuantu ita hakilar ita iha rekursu umanu natoon ona. Natoon iha ne’ebé natoon oinsá lerek.

Dala barak ita hakilar kona-ba estudante sira bele iha kompeténsia bázika kona-ba siénsia no morál ne’ebe sira aprende hosi eskola, enkuantu ita laiha fasilidade ne’ebé adekuadu hanesan biblioteka ne’ebé apropriadu no laboratóriu ne’ebé ejijente iha eskola sira. Dalaua’in ita haklalak kona-bá oinsá alunu sira bele domina língua estranjeira sira, enkuantu realidade hatudu, ita-nia estudante sira ko’alia de’it dalen Tetun iha fatin balun mós sei susar tebe-tebes.

Problema hirak ne’e sai hanesan matéria ida atu ita reflete. Se sistema edukasaun iha ita-nia rain ne’e investimentu tebes ida ka sai de’it hanesan lia mamuk ida atu ema bele gava ita katak ita luta duni ba sistema edukasaun ida di’ak?

Tuir Deninson in Lidia SPDi (2017) iha ninia artigu “Pendidikan sebagai Investasi Masa Depan Bangsa” haktuir katak “pem­bangu­nan pada bidang pendidikan dengan manusia sebagai fokus intinya telah memberikan kontribusi langsung terhadap pertumbuhan dalam bidang ekonomi, sebab melalui pendidikan seseorang akan memiliki pengetahuan dan keterampilan tertentu mi­salnya dalam memproduksi atau mendistribusikan suatu barang, sehingga pertumbuhan ekonomi akan dapat meningkat”.

Ida ne’e atu dehan katak ho dezenvolve setór edukasaun mak automátikamente sei kontribui direta ba iha kresimentu ekonomia, tanba edukasaun mak sei rezulta rekursu umanu sira-ne’ebé kompetente iha koñesimentu no abilidade oin-oin atu ajuda dudu kresimentu ekonomia iha nasaun ida-nia laran.

Lahó rekursu umanu ne’ebé kompetente, mak buat hotu sei la’o marka pasu (jalan di tempat, gerak!) iha fatin, no ida-ne’e akontese tanba setór edukasaun rasik la dezenvolve ho di’ak. Purtantu, edukasaun sai baze ba iha dezenvolvimentu setór sira seluk nian. Prepara rekursu umanu kompetente agora mak sei garante dezenvolvimentu país ida-nian iha futuru!

Ita labele nega katak investimentu iha forma kapitál umanu iha ninia retornu ne’ebé boot liu iha kapitál fíziku. Ativista edukasaun Dillan Azaly (2015) iha ninia paper kona-ba Investasi Pendidikan deskreve katak dezenvolvimentu rekursu umanu nu’udar elementu prinsipál ba iha bem estar no kresimentu nasaun ida-nian. Nia hatutan katak laiha país ida iha mundu ne’e mak bele dezenvolvidu ho de’it suporta hosi rekursu umanu ne’ebé ho kualidade edukasaun baixa. Iha aspetu ida-ne’e duni mak ita bele dehan katak investimentu iha setór edukasaun ne’e importante no ejijente duni.

Maneira barak ke ita-nia Governu bele halo atu dezenvolve di’ak liután setór edukasaun iha ita-nia rain, nune’e susesu iha aspetu investimentu ba área edukasaun bele iha ninia influénsia signifikante ba iha dezenvolvimentu nasionál. Tanba edukasaun tenke sai investimentu ida no nu’udar programa prioridadade ida, mak tenke balansia ho alokasaun orsamentu ida adekuada iha kada tinan fiskál Orsamentu Jerál Estadu nian.

Oinsá ita bele investe iha edukasaun, enkuantu alokasaun OJE ba edukasaun kada tinan ki’ik nafatin ka la liu pursentu sanulu hosi OJE? Alokasaun orsamentu ida ki’ik tebes ba edukasaun (kuaze kada tinan) ida-ne’e mós mak sai preokupasaun boot ba entidade sira-ne’ebé iha hanoin di’ak atu Timor-Leste bele fornese edukasaun ida ho kualidade ba timoroan hotu.

Investimentu iha setór edukasaun bele susesu bainhira ita investe iha rekursu umanu. Investimentu iha rekursu umanu signifika katak Estadu emita ka aloka fundu ho montante adekuadu no oportunidade atu hetan rezultadu ka retornu durante prosesu investimentu. Investimentu ida-ne’e iha ninia papel importante atu dudu kresimentu ekonomia. Investimentu kapitál umanu liuhosi edukasaun iha país sira hanesan ita-nia rain ne’e presiza tebe-tebes embora presiza tempu ne’ebé naruk ho eskala ne’ebé boot. Rezultadu hosi investimentu ida-ne’e, ita só bele sente hafoin tinan naruk nia laran.

Ha’u hanoin kala tanba razaun ida-ne’e mós mak ita-nia Governu kria duni Fundu Dezenvolvimentu Kapitál Umanu (FDCH) atu bele foku ba iha polítika oinsá mak bele kapasita ita-nia emar sira iha kompeténsia oin-oin atu bele kontribui ba iha dezenvolvimentu ita-nia rain nian. Instituisaun ida-ne’e kria ho Dekretu Lei nú. 1/2011, de 14 de Fevereiro no regulamentadu hosi Decretu-Lei nú.12/2011 de 23 de Março. Objetivu prinsipál hosi harii FDCH ida-ne’e mak atu hasa’e kualidade timoroan nian no prepara jerasaun foun ba futuru dezenvolvimentu Timor-Leste.

Tuir Boletim FDCH Vol. 17 abril – juñu 2019 ne’ebé hakerek na’in asesu liu hosi shorturl.at/ejrM0, iha ninia pajina 18 monstra kona-ba despeza orsamentu ba programa formasaun Profísionál ho montante orsamentu hamutuk $280,842.10; ne’ebé benefisia ona ba númeru benefisiariu nain 1830; Formasaun Téknika hó montante orsamentu hamutuk $816,620.53 ne’ebé benefisia ona ba númeru benefisiariu nain 975; Bolsa Estudu hó montante orsamentu $2,704,726.56 benefisia ona ba númeru benefisiariu ema nain 836; Tipu Formasaun Seluk hó númeru montante orsamentu $783,540.07 benefisia ona ba númeru benefisiariu nain 203. Nune’e total benefisiáriu hosi FDCH to’o tinan 2019 hamutuk 3844 ho montante orsamentu hamutuk $4,585,729.26 (relatóriu Taxa Ezekusaun Orsamentu FDCH 2019).

Hosi relatóriu iha leten, ita bele dehan katak FDCH durante ne’e halo duni esforsu lubuk ida ba formasaun kapitál umanu iha área oin-oin. Instituisaun ida-ne’ebé foufoun tutela ba iha MPIE no agora daudaun tutela fali ba MESSK ne’e sei kontinua koordena planu prioridade ho ministériu no instituisaun estadu akreditadu tomak haktuir mós ho prioridade Planu Estratéjiku Dezenvolvimentu Nasionál (PEDN) nian, mezmu serbisu no esforsu lubuk ida mak tenke sai nafatin prioridade atu bele atinje iha futuru.

Ita hein katak investimentu iha área edukasaun bele kontinua la’o ho esforsu tomak no labele nakonu de’it ho retórika, maibé presiza realiza tuir planu mestre PEDN nian ba setór edukasaun. Nasaun barak só bele hadi’a no dezenvolve nia rain bainhira sira dezenvolve di’ak iha setór edukasaun. Japaun, nasaun ida-ne’ebé bele inspira Timor-Leste, basá hafoin Nagasaki no Hirosima rahun ho bombardiamentu atómika Estadu Unidus nian iha funu mundiál daruak, ohin, Japaun sai país dezenvolvidu di’ak liu iha rejiaun ida-ne’e ho de’it sistema edukasaun ne’ebé di’ak. Timor-Leste mós presiza estuda hosi Japaun, oinsá investe iha edukasaun hodi ikus mai bele muda nasaun doben ida-ne’e ba nasaun dezenvolvidu ho kualidade umanu ne’ebé la’ós de’it matenek maibé ho morál mós. 

Labele Politiza Edukasaun

Polítika no edukasaun kompara hanesan moeda ne’ebé iha ninia superfísie rua hodi kompleta malu. Polítika eziste atu proteje edukasaun, edukasaun fali iha atu orienta polítika. Problema bele mosu bainhira iha motivu no interese polítika domina ona edukasaun, uza meiu hotu-hotu polítika nian hodi sakrifika buat hotu-hotu inklui neutralidade edukasaun nian. Edukasaun, ikus mai la’ós ona sai pilár importante ba dezenvolvimentu maibé sai fali meiu atu implementa interese polítika partidu sira ne’ebé kaer ukun (governasaun).

Iha kazu balun ne’ebé akontese daudaun (inklui karik iha ita-nia rain), ema hirak ne’ebé kaer kargu importante sira iha Ministériu Edukasaun (até eskola sira) tenke mai hosi partidu ne’ebé kaer hela ukun envezde ita haree liu ba ema ho kapasidade intelektuál no profisionál atu bele dudu sistema edukasaun ba oin.

Titulár ne’ebé tutela ba Ministériu Edukasaun divia tau ema teknokrátiku ruma maibé tau mak ema polítiku partidu nian. Nune’e, bainhira polítiku ida kaer pasta nu’udar Ministru Edukasaun, dala barak tenke aplika “limpeza” [ezonerasaun] ba ema sira-ne’ebé la’ós mai hosi ninia partidu (embora ema hirak ne’e hatene ona sa’ida mak sira tenka halo iha ministériu) hodi tau fali ema hosi ninia partidu rasik (dala ruma la komprende tan sa’ida mak sira tenka halo iha serbisu fatin). Ida ne’e duni mós mak akontese ona iha ita-nia rain durante besik dékada rua nia laran. Hosi Governu ida ba Governu seluk ida, prátika ida-ne’e mak domina.

Renato Costa Leite (2010, p. 3) deskreve katak “Os interesses políticos e as práticas educacionais, historicamente, mantêm uma relação que visa a dominação. Embora essas relações sejam desiguais, pois a política influencia muito mais a educação do que vice-versa, não podemos negar a importância do fazer educação no seu estado político”.

Se hanesan ne’e, ita la haree ona katak entre polítika no edukasaun iha atu kompleta malu, atu proteje malu no atu orienta malu, maibé entre edukasaun ho polítika iha atu kompete malu, sé mak atu domina sé? Buat ne’ebé dala barak akontese mak polítika mak sempre domina ona prátika sira edukasaun nian, hodi dudu sees objetivu fundamentál hosi edukasaun no dada besik liu mak interese polítika—interese polítika harahun tiha objetivu  fundamental hosi edukasaun nian—harahun tiha Timor-Leste nia futuru liuhosi harauhun tiha timoroan sira-nia futuru sai tebes duni.

Se ita hakarak iha Timor-Leste iha duni edukasaun ida kualidade hodi forma ita-nia ema sira ho siénsia no teknolojia ho abilidade no kapasidade oin-oin, mak ita tenke buka atu labele politiza edukasaun. La politiza edukasaun ida-ne’e, tenke hahú kedas hosi nível ministériu to’o ba iha eskola sira, atu halo eskola sira moos hosi interese polítika maibé konsentra de’it ba iha formasaun profisionál ho siénsia no teknolojia oin-oin ho morál.

Ho nune’e, mak ema hirak ne’ebé liu ona hosi eskola sei prontu atu hatán ba ejijensia merkadu serbisu nian, tanba nia iha ona abilidade no kompeténsia tékniku sira ne’ebé nia hetan hosi eskola. Se output hosi edukasaun mak barak liu kompete ba iha merkadu traballu nian duké kompete iha palku polítika, mak ita bele dehan katak sistema edukasaun ita-nian hetan susesu tuir polítika públika kona-ba edukasaun nian.

Reza A. A. Watimena (2017) iha ninia artigu edukasaun “Pendidikan yang Apolitis” aprezenta katak edukasaun iha nasaun barak sofre ona moras todan ida-ne’ebé hanaran moras apolitis (Eine Apolitische Bildung). Apolitis ne’e rasik mai hosi liafuan rua, “a” ne’ebé signifika “lahó” ka “sein” ka “anti” no “politika”  (Gregu antigu, katak politikos) ne’ebé signifika “buat hotu-hotu ne’ebé iha relasaun ho sidadania”.

Edukasaun apolitus katak edukasaun ida-ne’ebé laiha relasaun ho kestaun hotu-hotu ne’ebé relasiona ho asuntu sira sidadania nian. Signifika katak edukasaun ida-ne’ebé kortadu (kotu katak laiha relasaun) ho preokupasaun sira sósiu-polítiku nian. Edukasaun ida-ne’e foku de’it ba kestaun abilidade atu bele serbisu iha empreza ka instituisaun (fábrika no selseluk tan) ruma. Nia fokadu (konsentra) liu atu responde ba nesesidade merkadu traballu no morál no nunka kestiona papel hosi merkadoria serbisu nian no morál refere. Edukasaun sai tiha hanesan substánsia neutru ida (la adere ba A ka B) ne’ebé la iha relasaun ho kompetisaun sosiál polítika fora hosi sala de aula.

*) Hakerek na’in nu’udar profesór Biolojia ida iha Eskola Sekundária Públika Olocassa Ossú (Viqueque) no oras ne’e hela iha Ossú.

HAKEREK NO HATÁN

Please enter your comment!
Please enter your name here