COVID-19

DILI, 21 setembru 2020 (TATOLI)-Timor-Leste iha segunda ne’e livre tan husi pandemia globál surtu COVID-19 pozitivu hafoin halo tratamentu saúde iha sala izolamentu Sentru Saúde Vera Cruz Dili.

Pasiente ne’e nu’udar sidadaun indoneziu ho tinan 23 ne’ebé durante ne’e servisu iha Kompaña Wartsila hanesan servisu tékniku.

Notísia Relevante :Sidadaun indonéziu na’in ida kona tan COVID-19

Koordenadora Jerál COVID-19, Ministériu Saúde, Odete da Silva Viegas, hateten Ministériu Saúde deteta pasiente ne’e iha loron 26 fulan-agostu 2020 liubá, no ohin rekuperadu hafoin halo teste laboratóriu dalarua tutuir malu negativu.

“Ohin konfirmadu teste dalarua negativu no teste ba dahuluk iha loron 15 setembru no ikus iha loron 18 fulan-setembru entaun ohin ita hateten ba públiku katak sidadaun ne’e rekuperadu no konferensia imprensa hotu bele lori sai nia ba nia hela fatin,” dehan nia, iha Palasiu Sinzas Caicoli Dili.

Daudaun ne’e ema  na’in 298 ultrapasa fronteira ho dalan ilegal iha área Batugade Munisípiu Bobonaro, Salele Munisípiu Covalima, Sakato no Oesilo Oé-Cusse.

”Tanba ne’e mak husu ba komunidade hamutuk ho autoridade lokál sira iha área fronteira nian atu kontrola komunidade sira ne’ebé tama ilegalmente husi rai ketan mai territóriu Timor-Leste,” katak Odete.

Nia esplika totál ema ne’ebé tama iha mai Timor-Leste iha loron 20 fulan-setembru hamutuk 414, husi Fronteira Batugade 188, Salele ema na’in tolu no Sakato ema na’in tolu.

Dadus komulativu ezame laboratóriu hamutuk 6.718, negativu 6.531, totál ema iha kuarentena obrigatóriu 609, iha Dili 490, iha Munisípiu 119.

Totál ema iha auto-kuarentena  iha Dili 88, no Munisípiu 0. Sidadaun sira ne’ebé kompleta kuarentena obrigatóriu 4.228, Dili iha ema 3.553 no Munisípiu 675.

Notísia Relevante :Timor-Leste livre tan husi COVID-19

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here