Koordenadór Gabinete Apoiu Sosiedade Sívil (GASS)-Gabinete Primeiru-ministru, Filipe da Costa. Imajen TATOLI/Osória Marques.

DILI, 21 setembru 2020 (TATOLI)–Koordenadór Gabinete Apoiu Sosiedade Sívil (GASS)-Gabinete Primeiru-ministru, Filipe da Costa, hateten atu sai parseiru ne’ebé mak di’ak tenke iha planu estratéjiku, iha programa no iha planu asaun anuál.

Notísia Relevante: ONG nia papel halo advokásia no influénsia ba mudansa polítika

“Bainhira ita atu sai parseiru di’ak tenke iha buat importante balun maka presiza tenke iha mak pelumenus nia tenke iha planu estratéjiku, programa no iha planu asaun anuál,” Koordenadór GASS-Gabinete Priemiru-ministru, Filipe da Costa, iha abertura ba formasaun planu estratéjiku ba membru ONG sira iha Munisípiu Dili, iha salaun FONGTIL Caicoli, Dili, segunda ne’e.

Nia dehan, bainhira ONG ida mak laiha planu estratéjiku mak bainhira ema loke opurtunidade organizasaun sira hatama proposta iha fatin-fatin maibé laiha guia ida.

“Ami lahatene objetivu hosi sira-nia (NGO) proposta no proposta ne’e liga ba sira-nia atividade ka lae no liga duni ba Estadu nia objetivu ka lae maibé la’ós organizasaun hotu-hotu, balun-balun de’it,” nia dehan. 

Koordenadór GASS ne’e hateten, ONG sira devia tenke iha planu estratéjiku, programa no iha planu asaun anuál tanba bainhira laiha mak atividade hotu sei la la’o.

“Ha’u kontente tanba, ohin, ha’u rona katak iha formasaun kona-ba planu estratéjiku ba membru ONG sira. Espera ba oin dezeñu programa ne’e oinsa no kada programa tenke iha atividade ne’ebé mak bolu project managemennt planning tenke iha. Para, hatene katak halo atividade ida-ne’e, nia out put no out come mak saida. Ho hirak ne’e hotu, ninia impaktu no indikadór mak oinsá para ita bele sukat atividade ne’e to’o iha ne’ebé ona no ninia susesu,” nia dehan.

Aleinde ida-ne’e, nia dehan, tenke iha mós sistema finansia tanba dala barak proposta tama haree ba relátoriu finanseira seidauk loos.

“Ita-nia sistema exsel iha ona, la presiza ba sistema balansu ka system balance. Ita tenke hatene katak osan ne’e aloka ba komputadór ka ba treinamentu nian. Tanba sistema finansia mak laiha defisil ema atu halo audit ba ita-nia proposta tanba organizasaun ida-ne’ebé mak lahetan audit mak aban bainrua ema dehan ita laiha kredibilidade. Sasán ne’ebé mak atu halo di’ak mak tenke sistema finansia ne’e,” nia hateten. 

Turi nia, ONG ida tenke iha sistema jestaun rekursu no lei ka regra ruma hodi bele regula aividade hotu-hotu. Nia dehan, karik ONG iha kareta-ruma-entaun oinsá mak atu jere no pior liu mak kareta ba halo fali kampaña.

ONG sira, nia hateten, labele ba tuur de’it hodi halo estrutura maibé tenke halo planu no aprova para nune’e duadór sira bele servisu hamutuk ONG sira. 

Jornalista: Osória Marques

Editór: Cancio Xiemenes

HAKEREK NO HATÁN

Please enter your comment!
Please enter your name here