Vise Ministru Interiór, António Armindo. Imajen Tatoli/Egas Cristovao

DILI, 21 setembru 2020 (TATOLI)-Iha reuniaun Komité Revizaun Orsamentu Polítiku  (KROP) loron dahuluk, Ministériu Interior (MI) husu orsamentu adisionál ho totál $14.883.203,98, ne’ebé antes ne’e hetan tetu hosi Ministériu Finansa (MF) hamutuk millaun $13 ba MI, servisu imigrasaun no protesaun sivíl.

Maibé tuir Vise-Ministru Interior, António Armindo, orsamentu adisionál ne’e akumula hotu orsamentu ba MI, servisu imigrasaun no protesaun sivíl, enkuantu adisionál ba Polísia Nasionál Timor-Leste (PNTL) hamutuk $11.397.425.

“Iha proposta ne’e propoin aumenta osan adisionál ne’ebé ita hanoin importante atu implementa iha 2021, tanba antes ne’e la konsege priense iha pakote ne’ebé Ministériu Finansa fó, entaun ami mai ho alternativa hato’o proposta adisionál atu responde ba programa sira ne’ebé maka sei implementa iha 2021,” relata Vise-Ministru António Armindo, hafoin partisipa iha reuniaun KROP, ne’ebé realiza iha salaun MF, Aitarak-laran, segunda ne’e.

Notísia Relevante: Governu deside aumenta postu ualu iha fronteira terrestre

Instituisaun importante ne’ebé maka tutela ba MI maka PNTL, ne’ebé iha tinan oin instituisaun ne’e iha planu atu halo konstrusaun ba postu Unidade Patrullamentu Fronteira (UPF) lima inklui eskuadra polísia Ai-mutin, no sosa viatura sira hodi koloka ba eskudra polísia inklui komando munisípiu.

Nune’e mós, propoin sosa komputadór no mákina printer hodi distribui ba postu administrativu no munisípiu sira.

“Membru PNTL sira iha munisípiu hasoru difikuldade tanba dalaruma atu hakerek de’it relatóriu mós hakerek de’it ho liman,” nia haktuir.

Iha postu UPF sei kanaliza mós bee-moos tanba durante ne’e iha postu sira laiha, tanba ne’e bainhira konsege kanaliza maka la’ós de’it benefisia ba membru sira maibé mós ba populasaun sira ne’ebé hela besik postu.

Aleinde ne’e, ba servisu migrasaun ne’ebé sai mós instituisaun importante MI presiza fortifika rekursu hodi kontrola ema tama-sai iha pontu entrada sira.

“Ami propoin atu estabelese border management information system (BMIS), tanba sistema ne’e importante atu  nune’e servisu sira ne’ebé iha ligasaun ho servisu migrasaun bele la’o ho online de’it,” nia akresenta.

Daudaun ne’e, instalasaun ba sistema kuaze konklui ona maibé presiza prevee tan osan hodi instala mós ba embaixada no konsuladu sira iha rai-liur atu nune’e bele moderniza sistema.

Nune’e mós, instituisaun importante ba MI maka protesaun sívil, ne’ebé kontein servisu bombeiru no dezastre naturál.

“Dezastre naturál ne’e sempre akontese satán tempu udan besik ona, ne’ebé prepara kedas agora nune’e karik akontese udan iha tinan 2021 bele responde,” nia fó hanoin.

Maski nune’e, proposta adisionál ne’e seidauk iha rezultadu hafoin submete proposta ne’e ba ekipa KROP.

Iha tinan 2019, orsamentu ba MI hamutuk millaun $48.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here