Kontra atake entre jogadór Porto Taibessi FC no Kablaki FC. Imajen/espesial.

DILI, 21 setembru 2020 (TATOLI)-Prezidente Klube Porto Taibesi FC, Agostinho Nunes, gava ninia jogadór sira tanba hatudu progresu di’ak durante joga iha kopa Federasaun Futeból Timor-Leste époka 2020.

“Portu halao treinamentu hanesan mós klube sira seluk,  maibé jogadór sira mak iha disiplina hotu iha treinu no rona orientasaun saida mak klube fó,” katak nia ba Tatoli via mídia sosiál facebook, segunda ne’e.

Ho preparasaun ne’ebé maka daudaun ne’e iha nia fiar katak Portu Taibesi FC sei hakat ba finál ka semi finál.

Iha klube C, Portu Taibesi FC maka provizóriu lidera grupu ho pontu sia tanba joga dala tolu manán hotu. Grupu C kompostu husi  Portu Taibesi, Aitana Fc, Karketu Dili Fc, Sporting Klube de Timor no Academica.

Entretantu, antes ne’e Porto joga iha Primeira Divizaun Liga Futeból Amadora ne’ebé dadauk ne’e transforma ona ba Liga Futeból Timor – Leste (LFTL) iha époka primeiru maibé iha époka segundu Portu tenke degrada ba segunda Divizaun tanba lá hatudu performe di’ak.

Durante époka tolu klube ne’e joga de’it iha segunda Divizaun to’o ohin loron labele ultrapasa ba Primeira Divizaun tanba laiha performasaun di’ak.

Tanba ne’e maka agora klube refere mosu ho kualidade jogadór ne’ebé komesa hamorin ona klube nia naran iha kopa FFTL.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here