Segundu Komandante Polísia Munisípiu Dili, Superintendente Asistente Xefe, Euclides Belo. Imajen Tatoli/Antonio Goncalves

DILI, 21 setembru 2020 (TATOLI)- Komandu Polísia Munisipiu Dili hatún ona ekipa Servisu Informasaun Polísia (SIP) hodi koordena ho autoridade sira buka tuir autór deskoñesidu ida ne’ebé lori rama ambon hana Elísio Pereira (tinan 23) nia kabun karuk iha ninia hela fatin iha Aldeia 05, Pantai Kelapa, Suku Fatuhada, Postu Administrativu Don Aleixo, Munisípiu Dili.

Vítima nu’udar Estudante Universidade Orientál Timor Lorosa’e (UNITAL) husi Suku Haekoni, Postu Administrativu Baguia, Munisípiu Baukau.

Tuir rezultadu investigasaun provizóriu  PNTL nian ne’ebé  rekolla husi vítima katak, nia tuur hela iha uma-laran no sai ba uma oin maka derrepente hetan hana hosi ema deskoñesidu.

“Hodi kalan akontese krime ida iha Aldeia 05, Suku Fatuhada ne’ebé ema hana ho rama ambon  kona alin Elísio Pereira, nia kabun no lori ona ba ospitál. Ita nia seguransa sira sei halo investigasaun hodi buka tuir autór sira,” informa   Segundu Komandante Komandu Polísia Munisípiu Dili, Superintendente, Euclides Belo ba jornalista, ohin, iha Komandu PNTL, Caicoli, Dili.

Nia dehan, ekipa Servisu Informasaun Polísia (SIP) koordena ho autoridade sira deteta no deskonfia ona suspeitu balun.

“Suspeitu daudaun ne’e la’ós deskoñesidu, maibé ekipa investigasaun sei deskobre,” nia hateten.

Parte seksaun investigasaun kriminál mós kontaktu no rekolla ona informasaun husi vítima rasik no sasin sira ne’ebé hela besik ho vítima.

Durante semana ne’e, PNTL mós rejista kazu juventude ida ho naran Milcar Ramos Pereira tara-aan iha Dili no kontinua halo investigasaun ba suspeitu ida ne’ebé baku nia namorada no soe iha tasi ibun área Tasi-Tolu iha semana kotuk liubá.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here