Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

DILI, 21 setembru 2020 (TATOLI)-Iha proposta Orsamentu Jerál Estadu (OJE) 2020 Ministériu Turizmu, Komérsiu no Indústria (MTKI) hetan tetu hosi Ministériu Finansa (MF) hamutuk millaun $10 ba programa prioridade tolu.

“Tetu orsamentu ne’ebé ami hetan hosi Ministériu Finansa hamutuk  millaun $10, ne’ebé prevee ba prioridade tolu hanesan turizmu komunitáriu, komérsiu, indústria,” tenik Ministru Turizmu, Komérsiu no Indústria, José Lucas do Carmo da Silva, hafoin reuniaun Komité Revizaun Orsamentu Polítika (KROP), salaun Ministériu Finansa Aitarak-laran, segunda ne’e.

Ba indústria, MTKI atu halo parke industriál iha Liquiçá no sei prevee pakote hanaran ‘movimentu juventude inkubatór ba indústria’ hodi haforsa indústria ki’ik no média sira.

“Pakote ne’e sei loke ba área produtivu sira seluk, hodi bele diversifika no haforsa área indústria sira, la’ós ba aréa ida de’it maibé ba área hotu,” nia akresenta.

Enkuantu ba komérsiu, MTKI hakarak inisia lei hodi reforsa área ne’e no prevee mós ba bem servisu.

Kona-ba aréa turizmu, ministériu sei fó prioridade ba reabilitasaun sítiu turístiku hanesan Cristo Rei, reabilitasaun pauzada no uma turizmu sira iha área metiaut ne’ebé komesa a’at.

Aleinde ne’e, governante ne’e dehan MTKI sei fó prioridade ba fatin turizmu komunitáriu iha Dili laran hodi hafurak fali sidade sai sítiu istóriku.

“Iha mós prioridade turizmu komunitáriu atu haree ba sítiu turizmu komunitáriu iha Dili laran, atu hatur Dili sai fali sidade istóriku ida ne’ebé maka sei sai prioridade turizmu ninian,” nia dehan tan.

Maski nune’e, Ministru José Lucas, hateten tetu ne’e seidauk sufisiente ba ministériu tanba ne’e sei presiza tan adisionál.

“Ami husu adisionál tan millaun $5 tan atubele haforsa programa balun, maibé depende ba Komisaun Revizaun Orsamentu Polítika maka sei deside,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here