Formadu sira hasai foto hamutuk. Imajen/IDN-TL

DILI, 21 setembru 2020 (TATOLI)- Kargu Xefia ka Servidór Administrasaun Públiku (SAP) kompostu husi diretór jerál no diretór nasionál na’in-150, husi Instituisaun Estadu sira finaliza ona kursu formasaun avansada no lideransa estratéjika iha Institutu Defeza Nasionál Timor Leste (IDN-TL) iha loron 18 setembru 2020.

Notísia Relevante : Partisipante Formasaun “Governansa no Lideransa Estratéjia” Apresia Ho IDN-TL

Diretór Akademia IDN, Guilherme Soares informa servidór Estadu sira ne’e tuir formasaun iha jullu too setembru 2020 nia laran, kargu xefia sira ne’e hamutuk 50 husi turma A termina formasaun. Kontinua iha fulan agostu, diretór nasionál hamutuk 50 turma B, finaliza tan remata formasaun no iha loron 18 setembru, diretór nasionál hamutuk 50 ba turma C finaliza tan kursu.

“Kursu formasaun Avansada no Lideransa Estratéjika finaliza iha loron 18 setembru 2020, tuir kalendáriu ne’ebé termina ba oin sei kontinua fali ho serimónia graduasaun ne’ebé kabe ba instituisaun sira ne’ebé sai nain ba kursu formasaun avansada ne’e hanesan IDN, INAP, FDCH, Gabinete Primeiru-Ministru, KFP, sei determina data loloos ba serimónia graduasaun ho entrega sertifikadu ba partisipasaun no sertifikadu avaliasaun kuantitiva ba sira,” dehan Guilherme liu hosi karta komunikadu imprensa ne’ebé Agência Tatoli asesu, ohin.

Vantajen husi formasaun ne’e, IDN partilla informasaun hotu-hotu kona-ba lideransa hodi formadu sira bele kontribui di’ak liután prosesu harii estadu.

Vantajen seluk mak, IDN estabelese tan relasaun entre formadu sira ne’e sai forte liután kontribui ba liña koordenasaun entre diretór nasionál, diretór jerál sira ne’e sai di’ak liután ba futuru.

Formasaun ne’e IDN realiza tuir Dekretu-Lei Nº.12/2010 de 26 de agostu, Dekretu-Lei n.º 20/2015 de 8 de jullu (Orgânica do Ministério da Defesa) no Plano Estrategico de 2017-2022

Matéria formasaun ne’ebé servidór estadu sira hetan maka, Governasaun Di’ak no Jestaun Institusionál.

IDN nu’udar referénsia ba ninia kultura organizasaun ne’ebé orientada ba kualidade no efikásia, hadi’a dezempeñu institutu ne’ebé uza prátika governasaun di’ak no garante kualidade iha jestaun institusionál

Diretór Nasional João de Fatima da Cruz husi Sekretáriu Estadu Arte no Kultura sente orgullu tebes bele hetan oportunidade tuir kursu formasaun avansada no lideransa estratéjika realiza husi IDN ho parseria sira hodi aumenta sira nia koñesimentu di’ak oinsá atu eleva lideransa di’ak iha instituisaun estadu ida-idak.

Tuir nia haree, vizita ba Instituisaun F-FDTL no PNTL inklui interesante tebes hodi sira bele hatene lala’ok servisu planu ho dezafiu ne’ebé instituisaun Estadu sira hasoru.

IDN kontinua realiza kursu formasaun avansada no lideransa estratéjika ne’e ho estensaun ba fulan-tolu, nune’e, depende ba kurríkulu ho matéria ne’ebé IDN dezeña hodi fó formasaun ba lideransa kargu xefia hotu iha burokrasia nia laran, nune’e bele hadi’a di’ak liu jestaun hotu iha instituisaun Estadu.

Iha parte seluk, Diretora Nasional Informasaun no Teknolojia, Aida de Jesus Soares agradese ho formasaun ne’e bele hetan aprende buat barak hodi aumenta sira nia rekursu.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here