Foto hamutuk formandu VPU ho formador sira TLPDP. Imajen/Dok.PNTL

DILI, 21 setembru 2020 (TATOLI)- Membru Polísia Nasionál Timor-Leste (PNTL) husi Seksaun Investigadór Unidade Ema Vulneravel (VPU) na’in-30 kompleta ona kursu kombate krime violasaun no abuzu sexual ba menoridade.

Notísia Relevante : TLPDP Kapasita VPU Kombate Krime Violénsia Doméstika

Membru VPU sira tuir kursu durante semana rua hodi hadi’a di’ak liután atendimentu ba vítima.

Komandante Jerál PNTL, Komisáriu Faustino da Costa hato’o parabéns ba investigadór VPU sira ne’ebé maka partisipa kursu ne’e ho susesu, hodi nune’e, liu husi lisaun ne’ebé sira aprende bele sai referénsia ba sira atu halo servisu ho profisionál liután.

Nia dehan, violasaun sexuál no abuzu ba menór akontese tanba dependénsia ekonomia vítima ba suspeitu, estilu moris (life style), no informasaun teknolojia tanba ne’e husu ba membru PNTL sira kontinua halo sensibilizasaun violénsia bazeia ba jéneru no kontinua servisu maka’as atu nune’e bele redús krime ne’e.

Iha okaziaun ne’e Komandante Servisu Investigasaun Kriminál Nasional (SIKN) Superintendente Xefe, José Neto Mok dehan, kursu ne’e importante tebes ba investigadór sira hodi hasa’e sira nia koñesimentu no kapasidade membru sira nian kona-ba oinsá halo auto notísia, halo prosesu investigasaun ne’ebé kle’an no seguru ba vítima sira.

José hatutan, bainhira VPU halo investigasaun di’ak sei ajuda servisu prokuradór ne’ebé atende kazu ne’e bele estuda prosesu hirak ne’e bele hetan desizaun ne’ebé justu no favorese ba vítima no suspeitu.

Komandante ne’e husu ba sira depois tuir tiha kursu ida ne’e matenek no lisaun foun ne’ebé maka sira hetan fahe tutan ba sira-nia kolega ne’ebé ladauk hetan oportunidade mai tuir kursu ida ne’e.

“Imi bele sai fali instrutór ba maluk sira iha munisípiu tanba iha kada munisípiu iha Centro Formasaun ne’ebé maka halo husi parseiru TLPDP, entaun fatin iha ona oinsá kapasita ita nia ema hodi hatutan matenek ne’ebé sira hetan,” dehan Komandante SIKN Superintendente Xefe, José liuhusi komunikadu imprensa ne’ebé Ajénsia Tatoli asesu.

Iha fatin hanesan, Komandante TLPDP Superintendent Darren Booy hato’o parabéns ba partisipante hirak ne’ebé kompleta ona kursu,

“Ita boot sira kursu hasoru dezafiu balun, maibé fiar katak liu husi kursu ne’e bele aumenta no habelar liután ita boot sira nia koñesimentu,” nia hatete.

Nia haktuir tan, asaltu sexual no abuzu ba menór ne’e hahalok ida ne’ebé labele tolera no hein katak ofisial VPU sira maka ema ikus atu responde ba kazu hirak ne’e.

“Husu ba ita boot sira ne’ebé maka iha koñesimentu atu halo investigasaun atu bele koñese didi’ak kazu ne’e hodi lori prosesu to’o Tribunál hodi foti desizaun ne’ebé justu,” nia hateten.

Kursu kombate krime violasaun no abuzu sexual ba menór ne’e hahú iha loron 07 to’o loron 18 setembru, foin lalais ne’e.

Durante kursu investigadór VPU sira aprende kona-ba dezenvolvimentu abilidade kona-ba atendimentu ba vítima, lejizlasaun, foti deklarasaun, jestaun ba lokál du krime, meius de inkéritu, entrevista suspeitu, mandadu de buska no preparasaun arkivu kazu.

Kursu investigadór VPU faze daruak sei kontinua iha loron 9 novembru 2020, faze datoluk no dahaat sei hala’o iha tinan 2021.

Serimónia Enserramentu kursu no entrega sertifikadu ne’e partisipa husi Komandante CFP Superintendente Xefe Arquimino Ramos, Segundu Komandante CFP Superintendente Boavida Ribeiro no Instrutór kursu Leesa Alexander.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here