Primeiru-Ministru, Taur Matan Ruak, prezide reuniaun dahuluk KROP ba proposta OJE 2021, hamutuk ho membru, iha salaun Ministériu Finansa, Aitarak-laran, segunda(21/09). Imajen Tatoli/Egas Cristovão

DILI, 21 setembru 2020 (TATOLI)-VIII Governu Konstitusionál hahú reuniaun Komité Revizaun Orsamentu Polítiku  (KROP) dahuluk ba Orsamentu Jerál Estadu (OJE) tinan 2021, hodi verifika alokasaun estratéjika rekursu orsamentál atubele atinje kompromisu no objetivu, ne’ebé prevee ona iha dokumentu estratéjiku sira no iha tempu hanesan bele analiza kapasidade ezekusaun planu iha tinan 2021 no halo revizaun polítika ba orsamentu. 

Sesaun traballu ne’e realiza iha salaun Ministériu Finansa, Aitarak-laran, hahú ohin no iha kuarta (23/09) sei iha pauza tanba iha loron 23 to’o 25 setembru, membru Governu sira halo adiénsia públika iha komisaun Parlamentu Nasionál.

Hafoin iha sábadu no domingu ba oin maka sei hahú hikas KROP to’o loron 29 setembru, ne’ebé sei iha aprezentasaun no konkluzaun hosi Primeiru-Ministru, Taur Matan Ruak, ba setór hotu.

Durante realiza sesaun ne’e iha loron sábadu no domingu mós kontinua no oráriu hahú tuku 08:00 dadeer no ramata tuku 20:00 kalan.

Tuir ajenda ne’ebé iha, iha loron dahuluk hahú tuku 08:30 to’o 17:00 sei iha aprezentasaun hosi setór infraestrutura, ne’ebé kompostu hosi Ministériu Obra Públika (MOP), inklui Eletricidade de Timor-Leste (EDTL) no Servisu Água no Saneamentu (SAS), iha oras hanesan, iha mós aprezentasaun Instituto de Gestão no Equipamento (IGE), hanesan servisu no fundu autónomu.

Iha setór institusionál, iha setór institusionál iha parte dadeer sei iha aprezentasaun hosi Ministériu Defeza, FALINTIL-Forsa Defeza Timor-Leste (F-FDTL), Instituto Defeza Nasionál (IDN), iha tuku 13:30 to’o 13:30 sei iha aprezentasaun hosi Servisu Nasionál Intelijénsia (SNI), tuku 14:30 to’o 18:30 hosi Ministériu Interiór, Autoridade Nasionál Protesaun Sivíl (ANCP, sigla portugés), iha tuku 18:30 to’o 19:15 sei iha aprezentasaun hosi Polísia Sientífika Investigasaun Kriminál (PCIC, sigla portugés) no ikus liu tuku 19:15 to’o tuku 20:00 sei iha aprezzentasaun hosi Komisaun Funsaun Públika (CFP, sigla portugés).

KROP sei fahe ba sub-komité setoriál haat, hanesan sub-komité setór institusionál prezide hosi Primeiru-Ministru, sub-komité setór sosiál prezide hosi Vise Primeiru-Ministru no Ministra Solidaridade Sosia no Inkluzaun, sub-komité setór infraestrutura prezide hosi Vise Primeiru-Ministru no Ministru Planu no Ordenamentu no sub-komité setór ekonómiku prezide hosi Ministru Koordenadór Asuntu Ekonómiku.

Kada sub-komité sei halo analize ba submisaun orsamentál setoriál sira ho simultánea.

Notísia Relevante: Governu define tetu OJE 2021 biliaun $1,6

Konsellu Minsitru aprova no halo apresiasaun ba perioridade nasionál lima ne’ebé aliña ho programa ne’ebé sei guia prosesu elaborasaun OJE 2021 hanesan setór kapitál sosiál, dezenvolvimentu ekonómiku ne’ebé aliña mós atividade rekuperasaun ekonómika, infraestutura bazika no konetividade, dezenvolvimentu ambientál no reforma instutusionál.

Hosi totál biliaun $1,6 aloka ba kategoria saláriu no vensimentu millaun $216,2, sasán no servisu millaun $451,1,  tranférensia públika millaun $480,7, kapitál dezenvolvimentu millaun $235,8 inklui kapitál menór millaun $6.

Iha kapitál menór kontinua ba akizasaun ekipamentu no sasán seluk ne’ebé projeta katak iha tinan ne’e nia rohan (2020), la konsege halo ezekusaun maka ita sei engloba iha tinan oin mai (2021) ho montante millaun $6.

Tetu OJE 2021 inklui mós despeza ba Rejiaun Administrativa Espesiál Oé-cusse Ambeno (RAEOA) no Zona Espesiál Ekonomia Sosiál Merkadu Timor-Leste, (ZEESM,TL) hamutuk millaun $127, ne’ebé hamutuk ho proposta OJE 2020 xumba iha Parlamentu Nasionál no sei re-konsidera fali atu rejiaun espesiál ne’e bele kontinua implementa programa no projetu kontinuasaun inklui mós projetu foun sira ne’ebé nesesita atu implementa tuir planu estratéjiku rejiaun ne’e.

Tuir ajenda, ezekutivu sira sei submete proposta lei OJE 2021 ba Parlamentu Nasionál iha loron 15 outubru.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here