Prezidente CCI-TL, Oscar Lima halo diskursu iha seremónia lansamentu garantia kréditu ba empreza sosiál, iha edifísiu MTKI, Fomento, segunda (21/09). Imajen/CCI-TL

DILI, 21 setembru 202 (TATOLI)-Prezidente Kámara Komérsiu Indústria Timor-Leste (CCI-TL, sigla Portugés), Oscar Lima, apresia inisiativa VIII Governu Konstitusionál ne’ebé estabelese garantia kréditu ba empreza sosiál no espera bele diversifika ekonomia.

“Ha’u apresia Governu, liuhosi MTKI ho apoia hosi Programa Nasaun Unida ba Dezenvolvimentu (PNUD), ne’ebé estabelese programa garantia kréditu ne’e atu benefisia empreza sira hodi loke kampu traballu no diversifika ekonomia iha ita-nia rai laran,” tenik Prezidente CCI-TL, iha ámbitu lansamentu programa garantia kréditu ba empreza sosiál sira, iha edifisiu MTKI, Fomento, segunda ne’e.

Emprezáriu timor-oan ne’e dehan, bainhira nia hahú asume kargu atuál iha tinan-2014, ejize maka’as Governua atu fasilita BNCTL fó kreditu ho funan ki’ik ba setór privadu iha Timor-Leste, maibé agora MTKI konsege responde ona preokupasaun ne’e.

Notísia Relevante: BNCTL prontu implementa programa fasilidade garantia kréditu ba empreza

“Ha’u mós husu emprezáriu sira bainhira halo kréditu tenke jere halo di’ak tanba funan porsentu tolu ne’e ki’ik liu ona, espera bele sai susesu iha área negósiu no loke kampu traballu no diversifika negósiu iha área oioin iha Timor-Leste,”nia akresenta.

CCI-TL mós agradese ba parte rua ne’ebé konsege realiza ona mehi empreza ki’ik no médiu sira, no  husu Institutu Apoiu Dezenvolvimentu Emprezariál (IADE) atu kolabora hamutuk fó treinamentu tanba joven emprezáriu sira barak sei presiza kapasitasaun.

MTKI NO PNUD deside transfere ona fundu hamutuk $480.00 ba Banku Nasionál Komérsiu Timor-Leste (BNCTL, sigla portugés), ne’ebé hanesan Implementadór programa.

Ba faze dahuluk, empreza sira bele asesu kréditu  hahú hosi $1.000 to’o $25.000 ho funan  ki’ik ho porsentu tolu, ho rekezitu ne’ebé sei fó sai hosi implementadór programa.

Programa ne’e, sei foku liu ba empreza sira ne’ebé hala’o negósiu iha área agrikultura, turizmu, pekuária, peska, indústria no komérsiu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here