DILI, 21 setembru 2020 (TATOLI)-Advogadu privadu, Marito da Silva, ne’ebé fó asisténsia legal ba estudante Aliansa Universitáriu Timor-Leste (AUTL) sei halo rekursu kontra desizaun Tribunál Distritál Dili (TDD).
Notísia Relevante : Tribunál aplika multa $45.00 ba manifestante AUTL na’in-15
Iha loron 15 setembru 2020, liuhusi Juiza singular Maria Solana, aplika multa $45.00 ba arguidu (manifestante) AUTL na’in-15 ne’ebé halo manifestasaun hasoru Ministru Ensinu Superior, Longuinhos dos Santos tanba faktu provadu komete krime dezobediénsia.
Tuir entendimentu Tribunál nian kada arguidu ida sei selu multa loron ida $1.00 no durante loron-45 ne’e, ema ida sei selu hamutuk $45.00 no husi ema na’in-15 multiplika hamutuk $675.00.
Tuir lei kuandu dentru loron-60 arguidu sira la kumpre hodi selu multa mak sei hetan pena efetivu prizaun loron-30.
Defeza Marito da Silva hateten, desizaun Tribunál nian ne’e la justu tanba haree ba matéria faktu ne’ebé iha estudante sira iha fatin lokál edifísiu Ministériu Ensinu Superior la to’o minutu sanulu parte polísia to’o bolu no kaptura kedas.
Nia mós fundamenta katak, presiza haree mós lei internasionál ne’ebé Timor-Leste ratifika ona kona-ba manifestasaun.
Nia fó ezemplu referénsia matéria faktu ezemplu hanesan manifestasaun povu Timor-Leste hasoru Governu Australia kona-ba mina iha besik embaixada Australia iha Dili distánsia la to’o metru 100, maibé di’ak hela, inklui asaun estudante fó solidariedade ba povu Papua foin lalais iha Embaixada Indonézia nian oin ikus mai Tribunál halo absolvisaun.
“Tanba ne’e atu foti desizaun presiza haree sirkunstánsia analojia matéria faktu no arguidu sira hotu estudante nune’e iha tempu badak sei hatama rekursu,” hateten Marito da Silva, ba Agência Tatoli, ohin, iha TDD
Defeza sei uza tempu durante loron 15 sura husi akórdaun Tribunál nian sei hatama rekursu hasoru desizaun primeira instánsia hodi buka justisa lia loos.
Tribunál mós aplika multa ba arguidu na’in-18
Liu husi desizaun Tribunál Dili nian iha loron 18 setembru 2020, deside aplika mós multa hanesan ba arguidu na’in-18 sira seluk tanba faktu provadu komete krime dezobediénsia.
Arguidu sira ne’e polísia kaptura iha loron 11setembru, tinan ne’e, tanba hala’o manifestasaun hanesan kontra regra manifestasaun nian hodi tama ba iha area edifísiu MESK.
Jornalista : Nelson de Sousa
Editór : Francisco Simões
