Fromatura PNTL iha aniversariu PNTL ba da-XX, 27 marsu 2020. Imajen Tatoli/Eugénio Pereira

DILI, 21 setembru 2020 (TATOLI)-Vise Ministru Interiór, António Armindo, informa Governu sei la halo rekrutamentu ba membru Polisía Nasionál Timor-Leste (PNTL) iha tinan 2021.

“Rekrutamentu ba PNTL tinan 2021 ne’e laiha, tanba ne’e maka ami la husu iha proposta adisionál,” relata Vise-Ministru António Armindo, hafoin partisipa iha reuniaun Komité Revizaun Orsamentu Polítika (KROP) iha salaun Ministériu Finansa, Aitarak-laran, segunda ne’e.

Governante ne’e dehan, atu halo rekrutamentu sei hein estatutu PNTL ne’ebé maka dadaun halo hela revizaun.

“Ami halo revizaun ona ba estatutu no hein de’it Ministrériu Interiór aprezenta iha Konsellu Ministru, kuandu aprova ona ne’e hanoin maka bele hanoin halo rekrutamentu, tanba kuandu projetu lei sira aprova ona sei afeta ba ema sira ne’ebé maka idade reforma tenke reforma, kuandu ida ne’e akontese maka presiza duni halo rekrutamentu,” nia akresenta.

Notísia Relevante: Governu Sei Halo Integrasaun Servisu F-FDTL ho PNTL

Polítika VIII Governu Konstitusionál iha setór defeza no seguransa nian maka atu halo integrasaun servisu entre instituisaun FALINTIL-Forsa Defeza Timor-Leste (F-FDTL) no PNTL.

Iha tinan 2019, PNTL planeia atu rekruta tan membru hamutuk na’in-520 maibé rekrutamentu ne’e kanseladu.

Daudaun membru PNTL iha ona 3.000 resin ne’ebé destaku iha eskuadra no postu seguransa sira inklui ofisiál polísia suku iha  territóriu tomak.

Maski nune’e, instituisaun seguransa nasionál ne’e sei menus rekursu umanu hodi reforsa instituisaun, liuliu Ofisiál Polísia Suku (OPS) no Polísia Tránzitu ne’ebé sei menus.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here