iklan

NASIONÁL, HEADLINE, INKLUZAUN SOSIÁL

Traballadór seguransa Gardamor na’in-42 ezije direitu ba kompañia

Traballadór seguransa Gardamor na’in-42 ezije direitu ba kompañia

Traballadór seguransa Gardamor hamutuk ho SJT-TL, hato’o lamentasaun ba kompañia no eziji sira-nia direitu, iha sede SJT-TL, Bemori, sesta (18/09). Imajen Tatoli/Natalino Costa

DILI, 18 setembru 2020 (TATOLI)-Kompañia Gardamor hapara traballadór seguransa hamutuk na’in-42, ne’ebé durante ne’e serbisu halo seguransa iha Banco Nacional Ultramarino (BNU), Timor Telecom no Telkomcel.

Tanba ne’e, grupu traballadór hirak ne’e hato’o lamentasaun ne’e Sindikatu Jerál Traballadór Timor-Leste (SJT-TL), ne’ebé hanesan mahon ba traballadór sira, hodi husu sira-nia direitu ba kompañia.

“Ami-nia objetivu prezensa iha Sindikatu Jerál Traballadór, hakarak hato’o ba kompañia atu tuir regulamentu no fó ami-nia direitu,” dehan Portavós traballadór seguransa Kompañia Gardamor, Bão Justino, ba Agência Tatoli, sesta ne’e, iha sede SJT-TL, Bemori.

Nia hatutan: “Kompañia hapara ami desde iha fulan-abríl, sira abandona ami hanesan kompañia nia-ema,  sira hanesan la koñese, la tau atensaun no la hatene atu rezolve.”

Ba kestaun ne’e, traballadór sira konsege halo mediasaun ho Gardamor iha Sekretaria Estadu Formasaun Profisionál no Empregu (SEFOPE) maibé seidauk iha konkluzaun.

“Ami ba hasoru malu maibé sira (kompañia) la koa’lia lia-fuan ruma no problema rejistradu ona, karik sira nega lia fuan maka ami sei lori karta ne’e ba hatudu sira,” nia akresenta.

Durante ne’e traballadór sira asina kontratu ho parte BNU, Timor Telecom, no Telkomsel, maibé bainhira hetan problema Gardamor abandona.

“Ami hakarak kompañia tenke fó ami-nia direitu tuir regulamentu ne’ebé maka iha, tanba lei aplika ba traballadór sira iha Timor-Leste la justu, realidade maka kompañia viola traballadór sira-nia direitu,” nia akresenta.

Nia husu Governu haree filafali lei traballu hodi bele fó vantajen ba traballadór timor-oan iha sira-nia rai rasik.

“Ita lori lei ne’e haka’as ema estrajeiru ekuantu ita-nia traballadór hosi empreza timor-oan rasik ne’ebé fó serbisu, lei laiha ba sira, ida-ne’e ha’u sente la justu,” nia tenik.

Iha fatin hanesan, Sekretáriu Jerál SJT-TL, Almeirio Villa Nova, simu pedidu keixa traballadór Gardamor.

“Kompañia hahú hapara traballadór hamutuk 30-resin iha fulan-janeiru ne’ebé serbisu iha BNU, tanba ne’e sira hato’o keixa ba SEFOPE no halo kedan mediasaun no konsilasaun maibé parte kompañia nunka fó solusaun ba problema,” nia informa.

Tanba ne’e parte traballadór hato’o informasaun ba parte SJT-TL no halo kedan komunikasaun ba parte kompañia liuhosi karta notifikasaun.

“Ami halo esforsu bebeik hodi aproxima ho parte kompañia no buka solusaun ne’ebé di’ak ba traballadór ne’ebé lakon serbisu, atu nune’e sira labele de’it para ho kondisaun ne’ebé la justu tanba direitu hakerek iha lei traballu númeru 04/2012 kompañia tenke halo tuir,” dehan Almeirio.

Direitu traballadór ne’ebé sai disputa no parte sindikatu traballadór aprosima kompañia hodi rezolve maka direitu lisensa annuál, bonus annuál no direitu indemnizasaun tuir artigu 55 lei traballu.

Bainhira kompañia laiha ona kontratu serbisu tenke fó indemnizasaun ba traballadór sira bazeia ba durasaun serbisu no tuir artigu 56 ba sira ne’ebé serbisu liu tinan lima ba leten.

“Maioria traballadór sira ne’ebé Gardamor hapara serbisu ona ho durasaun entre tinan lima to’o sanulu ba leten, entaun sira iha direitu tuir artigu 56 no atribuisaun sertifikadu serbisu,” Sekretáriu Jerál SJT-TL esplika.

Enkuantu traballadór Gardamor iha Timor Telecom no Telkomsel iha Fomento, kompañia hapara serbisu iha fulan-agostu.

 “Ami tenta tuur hamutuk halo mediasaun no konsilasaun ho parte kompañia, maibé kompañia maka lakohi kolabora ho sindikatu no traballdór hodi buka solusaun justu tuir lei numeru 4/2012 ,” nia akresenta.

Nune’e, parte Sindikatu Traballadór lamenta tebes ho Gardamor ne’ebé nunka fó solusaun ba problema traballadór sira ne’ebé maka lakon ona sira-nia serbisu.

“Ami halo negosiasaun dala tolu ho parte jurídiku kompañia ninian, maibé laiha informasaun no laiha ninian fitback mai iha sindikatu kona-ba rezultadu proposta ne’ebé makaami hato’o ba sira,” nia haktuir.

Tuir Almeiro, bainhira empregadór ida atu hapara sira-nia traballadór tenke konsidera direitu hanesan indemnizasaun, nune’e traballadór sira labele lakon nesesidade ekonomia iha família molok hetan serbisu foun, tanba ne’e nia husu parte kompañia atu kumpre lei atubele dignifika traballadór.

“Ami husu kompañia sira atu komprende kona-ba artigu 55, maibé daudaun Gardamor nunka  kumpre artigu ida ne’e, tanba ne’e maka ami konsidera Gardamor nu’udar empregadór timor-oan nunka konsidera ita-nia traballadór nia direitu ne’ebé hatuur iha lei,” nia subliña.

Ba kestaun ne’e, Agência Tatoli seidauk konsege konfirma ho parte kompañia Gardamor.

Jornalista: Natalino Costa

Editora: Julia Chatarina

iklan
iklan

One Comment

Leave a Reply

iklan
error: Content is protected !!