Interface aplikasaun web musica.tl. Imajen/Espesiál

DILI, 18 setembru 2020 (TATOLI)-Iha ámbitu komemorasaun aniversáriu Telkomcel ba daualu, operadór telekomunikasaun lansa aplikasaun ho baze web no mobile, ho objetivu bele promove artista timor-oan no múzika Timór.

Product innovation manager, Samantha Abel, hateten intensaun kria aplikasaun ne’e tanba haree ba dezenvolvimentu múzika iha Timor-Leste no talentu joven.

“Telekomcel ho inisiativa halibur artista no múzika Timór iha plataforma ida hodi fó mós fatin ba artista sira atu promove sira-nia kreatividade no fó mós benefísiu ba sira,” Jerente ne’e dehan liuhosi konferénsia imprensa hanaran ‘Ola Jornalista’, iha Timor Plaza, sesta ne’e.

Aplikasaun ne’e bele asesu liuhosi website http://musica.tl no bele baixa aplikasaun mobile iha Google Play Store ba sistema Android no asesível mós iha App Store ba plataforma Apple.

“Daudaun ne’e, atu rejista no subskreve rona muzika iha aplikasaun online, presiza númeru Telekomcel, maibé ba ligasaun internet bele uza númeru hosi operadór telekomunikasaun saida de’it,” nia esplika.

Aplikasaun ho ligasaun internet ne’e hahú introdús iha fulan-jullu foin lalais, ho inisiativa atu populariza no akomoda múzika Timór rasik, ne’ebé timor-oan maka kanta no hakerek rasik ho forma fasilita espasu online hodi envia múzika ba plataforma ne’e.

Jerente ne’e esklarese, molok in trodús aplikasaun online ne’e, halo ona diskusaun ho artista balun hodi hetan konkordánsia hodi bele hatama sira-nia múzika ba aplikasaun.

Tuir akordu ne’ebé Telkomcel ho entidade sira halo, múzika ne’ebé hatama ba plataforma ho ninia konteúdu maka iha múzika, letra, vídeo, karoke, imajen no seluk tán.

“Ita kria aplikasaun ne’e tanba haree artista timor-oan barak maka iha talentu no múzika sira ne’e mosu de’it iha Youtube, tanba ne’e ita mós presiza valoriza ita-nia artista sira ninia talentu no kriatividade. Bainhira múzika sira tama ba aplikasaun musica.tl, entaun artista sira bele hetan benefísiu. Ne’e maka inisiativa halo aplikasaun múzika ne’e,” Samantha subliña.

Bainhira introdús aplikasaun ne’e, iha ona múzika 33 hosi artista timor-oan hamutuk 17 ho totál streaming 3.000-resin.

“Kooperasaun ho artista sira ne’e sei kontinua no agora daudaun sei iha hela prosesu ba akordu ho talentu foun sira seluk,” nia informa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here