Motor lubun ne’ebé Polísia Unidade Tránzitu halo apreensaun tanba viola lei tránzitu to’o agora na’in la ba reklama no barak ferrujen hotu ona. Tanba ne’e PGR koopera ho PNTL atu halo leilaun ba públiku. Imajen Tatoli/Eugénio Pereira

DILI, 18 setembru 2020 (TATOLI)- Prokuradór Jerál Repúblika (PGR) koopera ho Komandu Polísia Nasional Timor-Leste (PNTL) Munisipiu Dili, ohin, fó sai desizaun Tribunál Distritál Dili nian hodi entrega motorizada hamutuk 151 ba Diresaun Nasionál Patrimóniu Estadu atu halo leilaun ba públiku.

Notísia Relevante : ribunál Aprova Pedidu Leilaun Ba Transporte Abandonadu

Prokuradór Distritál Dili, Jacinto Babo Soares dehan, prosesu halo leilaun ba motór hirak-ne’e hanesan desizaun di’ak ida hodi bele hatama fali osan ba kofre Estadu.

Motor hirak-ne’e Polísia Seksaun Tránzitu Dili, halo apreensaun dezde 2007 to’o 2013 no to’o agora nain ba motorizada sira la ba halo reklamasaun.

“Relatóriu husi Diresaun Tránzitu Dili fó mai dezde 2007 to’o 2013, motór hirak ne’e rezultadu husi  operasaun ne’ebé tránzitu Dili halo ba motor sira ne’ebé sirkula iha Dili sein iha dokumentu no infrasaun sira ne’ebé halo husi ema sira uza ne’e,”  informa Jacinto Babo Soares ba jornalista liuhusi konferénsia imprensa, ohin, iha Komandu PNTL, Caicoli, Dili.

PGR no PNTL sei entrega hikas motór hirak ne’e ba Patrimóniu Estadu hodi halo rejistu depois sei trata dokumentu hotu iha Diresaun Nasionál Transporte Terrestre.

Iha fatin hanesan, Diretora Jerál Jestaun Patrimóniu Estadu, Timotea Marques dehan, motorizada hamutuk 151 sira sei halo rejistu hotu foin bele deside ninia presu hodi fó leilaun.

Nia esplika, tuir prosedimentu legál, tránzitu prende no pasa auto apreensaun no nain la ba halo reklamasaun, motór hirak ne’e afavór ba Estadu.

Kona-ba presu kada motór atu halo leilaun ba públiku, parte Patrimóniu Estadu sei halo tiha rejistu mak fó sai avizu ba públiku.

Antes ne’e, Komandante PNTL Munisípiu Dili, Superintendente Xefe Henrique da Costa, deklara motór sira- ne’e para tinan barak ona iha PNTL, Caicoli, Dili, balun soke no balun PNTL halo apreensaun, maibé too agora na’in ba foti no halo reklamasaun.

Tuir relatóriu PNTL nian, dezde tinan 2001 too agora motór hamutuk 500-resin inklui karreta balun para butuk iha arredores PNTL Caicoli hodi halo imajen Komandu Dili nakonu ho karreta no motór aat.

Jornalista   : Eugénio Pereira

Editór        : Francisco Simões

1 KOMENTÁRIU

  1. komentariu kiik oan ida:
    -PNTL Tranzitu Manajementu fraku, tamba prende motor no kareta husi 2007 ate 2013 laiha aksaun, ne’e hatudu momos katak laiha manajemntu ne’be diak.
    solusaun kiik oan ida:
    + PNTL tranzitu tenke kria regulamentu ou LEI ida konaba solusaun prende motor no kareta. (NIA NAIN TENKE BA OFFICE CAICOLI PRAZU FULAN TOLU HODI APREZENTA AN, DOKUMENTUS HODI FOTI NIA KARETA OU MOTOR). KUANDU NIA nain LA BA DURANTE FULAN tolu, antaun ne’e tama ba lista kategoria LELAUN………. labele hein to tinan barak. ezemplu mak hosi 2007 – 2013 sei iha nafatin. regulamentu mak iha karik motor no kareta lelaun sedu antaun hatama osan barak ba kofre estadu, komu kleur los ona tala ves lelaun mos ema la foti to soe deit iha tibar karik. obrigado barak i boa servisu. abraco forte.

HAKEREK NO HATÁN

Please enter your comment!
Please enter your name here