Komandante Jerál PNTL, Komisáriu Faustino da Costa no membru sira hasai fotografia ho Profesóra Manuela Isídro. Imajen/PNTL

DILI, 18 setembru 2020 (TATOLI)- Komandu Polisia Nasional Timor-Leste (PNTL) hala’o despedida ba Koordenadora ba kursu lian Portugés, Manuela Isídro ne’ebé remata ninia misaun hodi fó kursu Portugés ba membru PNTL sira.

Komandante Jerál PNTL, Komisáriu Faustino da Costa, hato’o agradese, ba Profesóra Manuela ne’ebé sai mestra ba Edukasaun Adultu  Dezenvolvimentu Lokál hodi hanorin lian Portugés ba membru PNTL sira.

“Lori Komandu PNTL nia naran agradese tebes-tebes ba sakrifisiu, ha’u la dehan esforsu tanba ho sakrifisiu ne’ebé durante ne’e nia buka meius oin-oin atu oinsá bele suporta PNTL,” hateten Komandante Faustino da Costa liuhusi karta komunikadu  ne’ebé Agênçia Tatoli asesu, ohin.

Iha fatin hanesan Profesóra Manuela Isídro hato’o agradese ba Komandu PNTL bele simu nia hanesan família ida iha instituisaun ida ne’e nia laran.

Nia dehan, durante tinan rua iha Komandu PNTL hanesan esperiénsia ida ne’ebé iha valór boot liu tanba bele haree membru sira ne’ebé hanesan nia estudante ho nei-neik bele ko’alia ona lian Portugés.

Iha okaziaun serimónia despedida ne’e fahe mós sertifikadu ba membru PNTL husi Unidade Espesiál Polísia (UEP) na’in-10 ne’ebé maka durante ne’e frekuente ona kursu lian Portugés.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here