Doasaun ran husi públiku ba BSN. Foto TATOLI: Rafy Belo

DILI, 18 setembru (TATOLI)-Estudante Departamentu Siénsia Saúde Institutu Superiór Kristál (ICS-sigla portugés), sesta ne’e halo doasaun ran ba Banku Sangue Ospitál Nasionál Guido Valdares (HNGV-sigla portugés).

”Ami agradese tanba inisiativa rasik husi estudante sira bele halo doasaun ran atu bele ajuda ema moras sira ne’ebé  mak presiza ran,” dehan Xefe Unidade Banku de Sangue, Januário da Cruz Freitas, ba jornalista sira iha HNGV Dili.

Notísia Relevante :Ema 204 mak fó doasaun ran ba banku sangue

Estudante hamutuk 200 maka ohin marka prezensa atu oferese ran maibé husi parte Banku Sangue nian sei halo teste para haree estudante ida ne’ebé maka prienxe kritéria no merese atu fó ran no ida ne’ebé maka labele.

Médiku sira sei halo teste ba ran hirak ne’ebé koleta nune’e bele halo prevensaun ba moras HIV/SIDA, sepilis, Hepatitis B no C.

”No ida ne’ebé mak livre husi moras haat ne’e ami sei rai bainhira pasiente sira presiza ami halo fornese,” katak nia.

Iha fatin hanesan Dosente husi Departamentu siénsia Saúde ICS, Ferdiano soares Cardoso, hateten sira fó doasaun ran ne’e hodi selebra loron mundiál pasiente seguru ne’ebé maka mundu tomak komemora iha kinta (17/09).

“Ami atu suporta an ba iha Banku  Sangue tanba ita-nia ran turuk ida ajuda ita-nia maluk sira ne’ebé mak presiza ran,” dehan nia.

Entretantu, antes ne’e Diretór Servisu Apoiu Dianóstiku no Terapiótiku Ospitál Nasionál Guido Valadares, (HNGV-sigla portugés), Mendes Pinto, hateten durante fulan-agostu liubá rejista ema hamutuk 287 maka fó ona doasaun ran ho gratuita ba ospitál nasionál

”Entaun ema ne’ebé mak halo doasaun ran ne’e hamutuk 287 mak fó ran no ran ne’ebé mak barak liu ran O hamutuk 118, ran B hamutuk 84, A hamutuk 68 no AB mak kiik liu hamutuk 17,” informa nia ba jornalista sira iha HNGV, kuarta ne’e.

Ema ho voluntáriu oferese ran purvolta 20-resin de’it, kompara ho família pasiente maka barak.

Notísia Relevante :Pasiente Fase Ran Hamutuk 161 mak Presiza Doasaun Ran Barak

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here