Webinar ANC-APNIC iha salaun ANC, Caicoli, sesta (18/09). Imajen Tatoli/Natalino Costa

DILI, 18 setembru 2020 (TATOLI)-Autoridade Nasionál Komunikasaun (ANC,sigla portugés) no péritu sira hosi Asia Pacific Network Information Center (APNIC) realiza semináriu web (webinar) kona-ba rekezitu ba kompañia sira ne’ebé fornese servisu internet (ISP-internet services protocol startup).

Prezidente ANC, João Olívio Freitas, informa webinar ne’e hodi partilla informasaun importante balun.

“Ita hetan apoiu hosi péritu APNIC ne’ebé hakarak esplika ba kompañia hirak ne’ebé halo investimentu ba fornesimentu servisu internet, kona-ba rekezitu saida dei’t maka presiza bainhira sira hakarak estabelese Internet Protocol Address (IPA),” dehan Prezidente ANC ba Agência Tatoli iha ninia knaar fatin, Caicoli, sesta ne’e, hafoin webinar.

Iha biban ne’e, APNIC fó hanoin kona-ba jestaun IPA bainhira liga ona ho servisu internet no esplika servisu saida maka sentru informasaun ne’e iha iha.

“Bainhira ita envolve ona iha servisu fornesimentu internet, presiza hatene servisu saida de’it maka sentru informasaun ba rede Ázia Pasífiku ne’e iha nune’e bainhira iha problema ruma ita presiza konfirma ba sira, liuliu ba IPA no númeru Internet Services Manager (ISM), tanba ne’e ita presiza kontaktu ba APNIC no husu sira esplika ba ita,” hateten João Olívio.

Aleinde ne’e, esplika ba partisipante sira kona-ba Internet Exchange Point (IXP) ho ninian funsaun no benefísiu sira, atu nune’e kompañia fornesidór internet bele komprende.

Atividade seminár virtuál ne’e nu’udar atividade hosi tinan-2019, ne’ebé maka hanesan preparasaun molok ANC hasai lisensa IXP ba operadór telekomunikasaun no kompañia fornesedór servisu internet.

Autoridade mós fó sai introdusaun badak kona-ba planu ba futuru liga ho lisensamentu IXP no ISP ho parseiru sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here