Primeiru-Ministru, Taur Matan Ruak, akompaña ho Prokuradór Jerál Repúblika, José Ximenes no ekipa, halo vizita ba kontrusaun edifísiu Gabinete rua PGR iha Colmera, kinta (17/09). Imajen Tatoli/Egas Cristovão

DILI, 17 setembru 2020 (TATOLI)-Hafoin vizita edifísiu Prokuradoria Jerál Repúblika (PGR, sigla portugés) no halo reuniaun ho Prokuradór Jerál Repúblika, José Ximenes no ekipa, maka Primeiru-Ministru (PM), Taur Matan Ruak, halo vizita ba konstrusaun edifísiu gabinete rua ne’ebé la’o hela.

Prokuradór José Ximenes, haktuir obra ne’ebé lokaliza iha edifísiu PGR nia sorin, iha futuru sei funsiona hanesan Gabinete Sentrál Kombate Korrupsaun no Kriminalidade Organizada no seluk maka Gabinete Kontasiozu Estadu.

Primeiru-Ministru, Taur Matan Ruak halao vizita Kontrusaun ba Prokuradoria Jerál Repúblika. Imajen Tatoli/ Egas Cristóvão

“Servisu espesializada rua ne’e funsiona dependénsia ba PGR,” relata José Ximenes hafoin akompaña Xefe Governu vizita obra, iha edifísiu PGR, Colmera, kinta ne’e.

Notísia Relevante: Selebra aniversáriu MP ba dala-20, Xefe Governu vizita edifísiu

Iha tinan 2019, Governu prevee orsamentu ba Prokuradoria Jerál iha kategoria kapitál dezenvolvimentu ba obra rua, ne’ebé ida maka iha Colmera no ida seluk konstrusaun edifísiu PGR  iha munisípiu Lautém.

Primeiru-Ministru, Taur Matan Ruak, akompaña ho Prokuradór Jerál Repúblika, José Ximenes no ekipa, halo vizita ba kontrusaun edifísiu Gabinete rua PGR iha Colmera, kinta (17/09). Imajen Tatoli/Egas Cristovão

“Konstrusaun iha Lautem relevánsia ho mensajen Primeiru-Ministru nian katak atu hakbesik justisa ba komunidade, ne’ebé Ministériu Públiku tenke nafatin halo esforsu no Governu presiza apoiu tanba Ministériu Públiku mós sei prepara hodi espande ba munisípiu sira seluk,” nia akresenta.

Obra ba gabinete rua ne’e ho andar ida, harii iha rai metru kuadradu 900-resin nia leten, moru protesaun haleu ho totál orsamentu hamutuk $746.000, ne’ebé daudaun ne’e atinje ona porsentu 35 no konstroe hosi empreza lokál.

Tuir kontratu obra ne’e hala’o iha setembru 2019 maibé tanba situasaun atuál maka seidauk konsege ramata maibé sei ramata iha tinan ne’e.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here