Treinador Klube Atletico Ultramar.Imajen/Midia FFTL.

DILI, 17 setembru 2020 (TATOLI)-Treinadór Klube Atletico Ultramar, Francisco Araújo, kinta ne’e la prontu atu simu derrota tanba ninia klube lakon ho AS Marca ho golu rua durante jogu Kopa Federasaun Futeból Timor-Leste (FFTL), iha Estádiu Munisipál Dili.

Iha konferénsia imprensa hafoin jogu ne’e ramata, treinadór ba klube no naran istimadu Ultramar husi Munisípiu Manatuto ne’e  dehan la espera atu lakon ho klube AS Marca tanba durante ne’e halo ona preparasaun tékniku no seluk tan ho másimu.

Notísia Relevante :AS Marca hakoi mehi Ultramar ho golu 2-0

“Ami durante ne’e prepara 100%. Buat hotu ha’u fó ona ba jogadór sira maibé rezultadu nafatin hatudu negativu, ba ha’u triste tebes,” dehan Francisco.

Iha okaziaun ne’e treinadór ne’e la biban atu satan netik ninia mataben tanba  la prontu atu simu derrota ne’e, maibé nia promete katak iha jogu sira tuirmai ninia klube bele manán hodi aumenta pontu.

“Ha’u lá espera jogu ne’e bele sai nune’e, no rezultadu bele sai nune’e,” tenik tan.

Treinador AS Marca, Romão Guterres.Imajen/Midia FFTL.

Iha sorin seluk, Treinadór AS Marca, Romão Guterres hateten : “Ha’u orgullu loos ohin ami bele manán. Ita bele dehan ami ne’e foin mak promovidu mai segunda divizaun Liga Futeból Amadora, iha tinan kotuk maibé ohin ami hatudu duni katak ami mós bele,”

Notísia Relevante :Hatrick Garcia lori Ponta Leste manán Ultramar 4-1

Jornalista : Hortencio Sanchez

Editór      : Agapito dos Santos

HAKEREK NO HATÁN

Please enter your comment!
Please enter your name here