Ilustrasaun subornu. Imajen/Google

DILI, 17 setembru 2020  (TATOLI)-Ministériu Públiku (MP) liuhusi Prokudór titular Rogério Viegas iha nia alegasaun husu ba Tribunál Distritál Dili (TDD) atu aplika pena prizaun tinan-tolu no suspende tinan-tolu ba arguidu ho inisiál MDS tanba deskonfia pratika krime korrupsaun ativa ne’ebé hodi tenta atu fó osan ba membru polísia.

Prokudór Rogério Viegas hateten, iha produsaun prova liuhusi deklarasaun arguidu, testemuña no auto ne’ebé iha faktu balun ne’ebé mak provadu katak iha loron 27   abríl  2019, purvolta tuku 22:05 Otl, iha area Hudi-Laran, Suku Bairru-Pité, Dili, membru  Polísia husi Unidade  Tránzitu Munisípiu Dili hala‘o hela auto stop hodi pasa revista dokumentu ba karreta no motor ba sirkulasaun iha area refere, no momentu ne’ebá arguidu maka lori karreta kamioneta ida ho matrikula 59-247 TL husi dirasaun Bairru-Pité  kuandu arguidu iha fatin auto stop, membru polísia hodi husu dokumentu karreta nian no mós husu karta kondusaun, hafoin entrega tiha dokumentu karreta nian ba Polísia Tránzitu halo konfirmasaun ba dokumentu sira ne‘e.

Liuhusi konfirmasaun ne’e nota katak dokumentu KIR karreta refere mate tiha ona ka liu ona prazu. Aléinde ne‘e, membru Polísia Tránzitu husu mós ba arguidu  ninia karta kondusaun, maibé arguidu hatán katak ninia karta kondusaun  hela iha uma. Nune’e, arguidu komesa hatama ninia liman ba nia bolsu hodi hasai osan ho montante $20.00  hodi fó membru Polísia Tránzitu ne’e iha fatin auto stop  no membru Polísia Tránzitu ne’e halo kedas  detensaun flagrante delitu ba arguidu hodi submete ba prosesu.

MP akuza arguidu  nu’udar autór material ho forma konsumada ba konkursu krime korrupsaun ativa ba aktu ilísitu, ne’ebé previstu no punidu tuir artigu 294 n° 2, husi Kódigu Penal no krime kondusaun sem karta, ne’ebé’ previstu no punidu tuir artigu°. 207°, husi Kódigu Penal.

Maibé konkursu krime sem karta kondusaun depois  hetan karta ofisial husi Diresaun Nasional Transporte Terrestre (DNTT) katak arguidu iha karta kondusaun. Nune’e MP  husu Tribunál atu absolve arguidu husi krime ne’e ne’ebé antes ne’e MP akuza.

Kona-ba krime korrupsaun ativa MP mantén ho produsaun prova iha audiénsia julgamentu liu ba arguidu rasik konfesa  no auto ne’ebé iha provadu katak momentu ne’ebá arguidu ho intensionalmente  fó osan ba membru Polísia Tránzitu.

Tanba ne’e prienxe rekizitu krime  korrupsaun ativa Artigu tuir artigu 294  iha alínea 1. Ema ne’ebé, nia rasik ka hodi ema seluk, ho nia autorizasaun ka ratifikasaun, fó ka promete ba funsionáriu ka ba ema seluk ho funsionáriu ne’e nia koñesimentu, vantajen patrimoniál ne’ebé funsionáriu ne’e la iha direitu atu hetan, ho finalidade ne’ebé hatudu hela iha artigu 292, sei hetan pena prizaun tinan 3 too tinan 10. 2. Kuandu ho hahalok deskritu iha númeru anteriór ajente hakarak hetan finalidade ne’ebé artigu 293 hatudu nia sei hetan pena prizaun too tinan 2 ka multa.

Prokudór Rogério Viegas hatete, ho rekizitu iha artigu ho faktu ne’ebé  iha prienxe duni arguidu halo ho konsentimentu aktu refere. Tanba ne’e ba krime ne’e iha moldura penal ne’ebé boot, maibé parte MP haree katak kustu osan ne’ebé arguidu tenta atu fó ba polísia ho montante ki’ik tanba ne’e atu halo prevensaun ba futuru atu labele akontese tan  mak MP solisita ba Tribunál atu aplika pena prizaun mínimu tinan-tolu no suspende ba tinan-tolu.

Parte defeza dehan, faktu sira ne’ebé iha  perante julgamentu hirak liu ba arguidu konfesa ho parsialmente ba Tribunál ho arrependimentu ba hahalok sira-ne’e tanba ne’e husu ba Tribunál    atu tetu tuir konviksaun tasik .

Hafoin rona tiha alegasaun parte sira, Tribunál deside adia fila-fali julgamentu ne’e ba iha loron 30 fulan setembru tinan ne’e,   iha tuku 11:00 Otl,  hodi rona desizaun Tribunál nian

Prosesu julgamentu ne’ebé hala’o iha Tribunál Distritál Dili, kurta ne’e, prezide husi Juis koletivu Maria Solana, Ana Paula Fonseca, Ivan Suritai, Ministeiru Públiku reprezenta husi prokuradór Rogério Viegas no arguidu hetan asisténsia legal husi Defensor Públiku.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here