DILI, 17 setembru 2020 (TATOLI) – Tebes. Kazu sivíl no kazu krime barak pendente iha Tribunal sira tanba rekursu la to’o no minima kondisoens. Faktu hatudu momoos no loloos iha kazu asidente tráfegu ida iha area Comoro, Dili, ne’ebé akontese iha loron 19 dezembru 2018, ohin, mak halo julgamentu iha Tribunál Distritál Dili (TDD).
Kazu ne’ebé ho natureza krime omisídiu neglijente ne’e akontese bainhira arguidu ho inisiál AG kondús hela karreta baskulante ho xapa matrikula 56-928 TL soke-mate vítima Joanico Saldanha.
Faktu ne’ebé aprezenta ka arrola husi Ministériu Públiku (MP) no sai hanesan baze akuzasaun MP nian katak, iha loron 19 dezembru 2018, arguidu kondús karreta baskulante to’o iha area Comoro besik iha eskola 30 agostu nia oin, arguidu la haree vítima atravesa husi liman loos no karuk, too iha klaran kuandu vítima atu hakat ba jardín leten, maka karreta nia espellu fai kona vítima monu ba rai.
Momentu ne’ebá halo esforsu hotu evakua vítima ba Ospitál Nasionál Guido Valadares (HNGV) maibé esforsu hirak ne’e hela ho esforsu tanba vítima mate iha fatin tiha ona.
Arguidu mós fó ona indemnizasaun ho osan ba família vítima sira iha loron 20 dezembru 2018 ho valor $2.500,00 no iha faze tuir mai mós arguidu fó tan osan valor $2.000.00 iha loron 7 janeiru 2019.
Objetivu fó osan ne’e oinsá atu responsavel ba prosesu vunebre matebian nian to’o kore-metan. Mezmu nune’e, arguidu nia hahalok nee de liberada, konsiente katak halai laiha kuidadu.
Ministériu Públiku akuza arguidu ho krime omisídiu neglijente ne’ebé previstu iha artigu 140 iha kódigu penal Timor-Leste.
Hatán ba akuzasaun hirak ne’e arguidu konfesa ho parsialmente, katak faktu sira-ne’e loos hotu no rona tiha deklarasaun arguidu nian, Tribunál husu ba Ministériu Públiku no defeza hodi tama kedas ba alegasaun.
Iha alegasaun MP li husi Prokuradora Maria Ivonia, hateten, MP mantein ninia akuzasaun, no tetu mós indemnizasaun sira ne’ebé arguidu selu ona.
Parte defeza mós husu Tribunál atu pondera fó pena adekuadu ba arguidu. Hafoin alegasaun Tribunál deside adia julgamentu ne’e ba prosesu semana oin durante prazu loron sanulu nia laran hodi rona desizaun ikus.
Julgamentu ne’e prezide husi Juiz Argentino Nunez, MP reprezenta husi Prokuradora, Maria Ivonia no arguidu hetan asisténsia legal husi Defensor Públiku Agostinha Carvalho.
Jornalista : Nelson de Sousa
Editór : Francisco Simões
