Prezidente Parlamentu Nasional, Aniceto Longuinhos Guterres Lopez. Imajen/Antonio Goncalves.

DILI, 17 setembru 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, propoin atu kria tán Komisaun Espesializada Permanente (KEP) ne’ebé trata asuntu Sidadania ho papél estabelese mekanizmu partisipasaun públika iha atividade parlamentár nian.

“Aspetu esensiál seluk mak interasaun ho sidadaun sira. Iha aspetu ida-ne’e, ha’u propoin atu kria Komisaun Espesializada Permanente ba Sidadania, ne’ebé ho papél estabelese mekanizmu partisipasaun públika iha atividade parlamentár balu hanesan debate, audiénsia, esklaresimentu hamutuk ho deputadu no membru Governu sira,” dehan Aniceto Guterres liuhosi sesaun solene abertura ba Lejislativa datoluk iha Lejislatura dalima, iha plenária Parlamentu Nasionál, foin lalais ne’e.

Prezidente Parlamentu Nasionál dehan, planu ne’e ho forma ida hodi fó kontinuidade ba demokrasia partisipativa no hakbesik relasaun povu ho nia reprezentante no governante sira.

Durante ne’e Parlamentu Nasionál iha KEP hitu (7) komposta hosi Komisaun A (Justisa no Konstitusionál), Komisaun B (Negósiu Estranjeiru, Defeza no Seguransa), Komisaun C (Finansa Públika), Komisaun D (Ekonomia no Dezenvolvimentu), Komisaun E (Infraestrutura), Komisaun F (Saúde, Seguransa Sosiál no no Igualdade Jéneru) no Komisaun G (Edukasaun, Juventude, Kultura no Siadadania).

Entretantu, proposta refere durante ne’e engloba iha Komisaun G maibé Prezidente Parlamentu Nasionál, Aniceto Guterres, hakarak haketak asuntu Sidadania ne’e ba KEP ketak ida nune’e bele promove liután partisipasaun públiku ba iha atividade parlamentár nian.

Maske nune’e, Prezidente Parlamentu Nasionál fó-sai katak proposta ne’e sei lori tempu tanba presiza rezolve uluk problema nesesáriu sira seluk iha uma fukun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here