Komandu FALINTIL-Forsa Defeza Timor-Leste liuhusi Unidade Polísia Militár (PM), ohin, iha kuartél Polísia Militár nian iha Kintál Boot, Dili, hala’o graduasaun ba membru na’in-46. Imajen Tatoli/António Gonçalves

DILI, 17 setembru  2020 (TATOLI)-   Komandu FALINTIL-Forsa Defeza Timor-Leste liuhusi Unidade Polísia Militár (PM), ohin, iha kuartél Polísia Militár nian iha Kintál Boot, Dili,  hala’o graduasaun ba membru  na’in-46.

Notísia Relevante : Polísia Militár Halo Ezersísiu ba Asegura Seguransa Durante Impase Polítika

Membru Polísia Militár. Imajen Tatoli/António Gonçalves

Membru sira ne’e mai husi unidade F-FDTL nian ne’ebé hetan rekrutamentu dezde tinan 2017 no tuir ona kursu táktika militár oin-oin iha Sentru Formasaun “Kursu Maubere V” Polísia Militár ne’ebé apoia husi Instrutór Polísia Militár Brazil.

Husi totál membru 46, Xefe Estadu Maiór Jenerál F-0FDTL Majór Jenerál Lere Timur entrega mós sertifikadu apresiasaun ba membru Polísia Militár na’in-tolu ne’ebé hetan kategoria di’ak, kompostu husi  Soldadu Pires, Bonaparte no Soldadu Araújo.

Majór Jenerál Lere Anan Timur hato’o parabéns ba membru foun sira ne’ebé ohin sai Polísia Militár no husu atu mantein orden no kontrola dixiplina iha militár nia la naran. Tanba  Polísia Militár mós iha knaar boot ida atu ajuda PNTL iha kualkér situasaun seguransa iha rai-laran.

 “Imi tenke profisionál atu sai polísia militár, imi tenke dixiplina, segundu hatudu ezemplár no sai ezemplu ba ema seluk, imi tenke iha inisiativa no tenke hatene atu sai husi situasaun difisil no buka hasoru obstákulu hodi sai husi situasaun difisil,” dehan Lere liuhusi ninia diskursu.

Lere hatutan, bainhira membru sira halo servisu ho dixiplina sei halo di’ak liután hodi manan konfiansa husi Estadu no povu rasik.

Nia husu atu membru sira kumpre regra saida de’it maka fó sai husi ierarkia Komandu F-FDTL no kontrola mós membru F-FDTL sira ne’ebé viola regra, liuliu hirak ne’ebé buka halo problema diskoteka  ho kondisaun lanu hodi perturba oden públiku tenke atua hodi militár sira kumpre regra.

Nia dehan, ohin loron ema akuza Polísia Militár fasilita maka sai autór hodi fasilita jogu ilegál iha Timor-Leste.

“Ha’u husu ba imi nia komandante no imi sira hotu, labele monu ba manobra no labele husik ema sosa imi nia fuan no laran,” nia apela.

Lere dehan servisu Polísia Militár halo operasaun iha rezidénsia Angela Freitas sai polémika boot, maibé servisu ne’ebé Polísia Militár halo la viola regra ruma.

Lere hatutan, hanesan komandante nia prontu hatán bainhira ema ruma kestiona treinamentu ne’ebé Polísia Militár hala’o iha rezidénsia Angela Freitas.

Iha parte seluk, Lere rekoñese daudaun ne’e Komandu Polísia Militár hasoru dezafiu oin-oin iha servisu hanesan menus fasilidade servisu, transporte no seluk tan.

Komandante F-FDTL ne’e mós husu ba membru F-FDTL sira atu labele envolve iha grupu organizasaun Arte Marsiál hodi ba halo fali juramentu ba bandeira nasionál nasaun seluk nian.

“Ha’u sei la tolera imi militár atu halo juramentu fali ba bandeira nasaun seluk nian,  imi so halo juramentu de’it ba bandeira RDTL, se maka ba jura fali ba bandeira seluk ne’e hanesan traisaun no viola regra militár,” nia apela.

Iha fatin hanesan, Komandante Unidade Polísia Militár, Majór Abel da Costa “NIKI” dehan, formasaun ne’e halo hodi kapasita membru sira atu bele preparadu bainhira estadu presiza sira nia rekursu atu halo intervensaun ba problema ruma

“Asegura F-FDTL, garante orden dixiplina, garante seguransa infraestrutura material no membru F-FDTL tomak no garante investigasaun ba membru sira tuir lei,” Majór Niki hateten.

Nia dehan, Polisía Militár mós hola parte atu halo seguransa ba entidade estadu Timor-Leste sira.

Alende ne’e, apoiu seguransa ba povu Timor-Leste iha situasaun perigu ba perturbasaun seguransa interna no esterna.

 Niki hatutan, Polisia Militár mezmu servisu hasoru obstákulu oin-oin, maibé sira eziste hodi hala’o nafatin servisu, mezmu menus ekipamentu, transporte no lojístika seluk tan.

“Apela ba PM foun, imi tinan-tolu hela iha, ohin imi sai ona Polísia Militár 100%, karreira ne’ebé imi hetan sai PM iha responsabilidade boot la’ós atu hatudu aan  katak, ha’u mós Polísia Militár, maibé imi tenke enfrenta situasaun hasoru problema sivíl, no problema militár,  ita tenke sempre prontu atu atende servisu oras 24 nia laran,” nia hatete.

Majór Niki apela mós ba membru sira ne’ebé halo servisu la kumpre regra no la dixiplina tenke hato’o ba Komandu Polísia Militár atu koopera.

 Serimónia graduasaun partisipa direita hosi komandante unidade F-FDTL hotu, parseiru dezenvolvimentu husi forsa Nova Zelándia, Austrália, Portugál, Japaun Xina no família sira hodi asiste mós atrasaun anti huru-hara militár nian.

 Jornalista  :  Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here