Polísia Unidade Tránzitu hatún hela motor hirak ne’ebé Polísia sira halo apreensaun iha area Palacio do Governu nian, tersa (02/06/2020). Imajen Tatoli/Dok.

DILI, 17 setembru 2020 (TATOLI) – Liuhusi atividade auto stop ka pasa revista ne’ebé  Polísia Unidade Tránzitu Seguransa Rodoviária Nasional (UTSR) hala’o, ohin, iha Dili, konsege identifika transporte hamutuk 49 ne’ebé membru Polísia sira utiliza la iha dokumentu.

Polísia mós halo apreensaun ba motor 18 no karreta ida nu’udar membru Polísia sira nain, tanba dokumentu la iha no motorista balun la iha karta kondusaun ka transporte balun nia KIR mate (inválidu) ona.

Komandante Unidade Tránzitu Seguransa Rodoviáriu (UTSR), Superintendente, João dos Reis Belo, hateten pasa revista ne’e hanesan operasaun polisiál seguransa rodoviáriu nian hodi aplika lei.

“Rezultadu pasa revista ohin prende motorizada hamutuk 18, karreta ida, dokumentu sia no karta kondusaun hamutuk 49. Ami identifika katak motorista barak nia KIR mate, karta kondusaun mate, liu-liu karreta governu no  karreta barak la iha dokumentu kompletu,” informa Komandante João dos Reis Belo, ba jornalista iha Kuartél Jerál PNTL, Caicoli, Dili.

Eis Komandante UPF dehan, operasaun ne’e halo atu kontrola uluk membru PNTL sira ne’ebé lori transporte estadu no transporte privadu sira tenke kumpre regra sira tuir lei.

“Ami tenke hamoos ami nia uma-laran tanba ne’e halo check point ba motorizada no karreta ne’ebé membru PNTL uza inklui karta kondusaun membru sira ne’ebé maka uza transporte governu no privadu tenke kompletu,” nia hatete.

Superintendente João hatutan, husi prosesu pasa revista ne’e sei aplika situasaun normal hanesan ba populasaun sira.

Ba abitante sira ne’ebé lori transporte la iha karta kondusaun, dokumentu mate, karta kondusaun mate tenke selu koima iha Estadu Timor-Leste.

Nia hatutan, operasaun pasa revista ne’e sei kontinua halo nafatin hodi minimiza mós asidente tráfegu iha Timor-Leste.

Tuir relatóriu PNTL durante fulan, jéneru too setembru 2020, ema na’in 45 mate iha estrada tanba asidente tráfegu.

Jornalista   : Eugénio Pereira

Editór        : Francisco Simões

1 KOMENTÁRIU

  1. Servisu hanesan ne’e mak diak, tenke mos hosi uma laran mak sai ba liur, labele uma laran sabraut hela mas hamriik iha leten hodi ba urus ema seluk nian.
    mak polisia sira hatudu ne’e, afinal POLISIA barak mak la kumpri lei hodi selu taxa. LA FO EZEMPLU NE’EBE DIAK BA POPULASAUN.
    parabens ba esforsu tomak, Bom Trabalho e Deus Akompanha

HAKEREK NO HATÁN

Please enter your comment!
Please enter your name here