Komandante Jerál PNTL, Komísariu Faustino da Costa ho Segundu Komandante Komísariu Mateus Fernandes. Imajen Tatoli/Egas Cristovão

DILI, 17 juñu 2020 (TATOLI)- Komandante Jerál Polísia Nasionál Timor-Leste (PNTL), Komisáriu, Faustino da Costa no Segundu Komandante Jerál PNTL, Komisáriu, Mateus Fernandes, ohin, relata prosesu detensaun membru arte marsiál Persaudaraan Setia Hati Terate (PSHT) na’in-290 ba Prezidente Repúblika, Francisco Guterres “Lú Olo”.

Notísia Relevante : Ema balun fasilita membru PSHT sa’e sabuk iha Indonézia

PNTL halo detensaun ba membru PSHT hirak ne’e tanba haku’ur liu liña fronteira terrestre Timor-Leste “ilegálmente” hodi ba partisipa ritual serimónia sa’e sintu ka pengesahan iha Atambua, Indonézia.

“Iha semana ne’e operasaun konjunta PNTL no F-FDTL kaer membru PSHT sira na’in-290 ne’ebé ba sa’e sabuk iha Indonézia iha ámbitu estadu emerjénsia,” informa Komisáriu Faustino da Costa, ba jornalista hafoin hasoru malu ho PR Lú Olo iha Palásiu Prezidente, Dili.

Ema sira ne’e viola regra Estadu Emerjénsia, tanba ne’e Komandu PNTL sei halo prosesu hodi hein autór sira ne’e kumpre tiha regra Ministériu Saúde iha kuarentena durante loron 14 molok aprezenta kazu ne’e ba Ministériu Públiku.

Komandu PNTL alerta ba orgaun másimu  PSTH, Ikatan Keluarga Silat (IKS) Timor-Leste Kera Sakti no KORK atu kontrola membru sira hodi kumpre regra Estadu emerjénsia.

Iha enkontru ne’e, Komandu PNTL informa mós ba Prezidente Repúblika, Francisco Guterres “Lú Olo” kona-ba prosesu haruka tan forsa Unidade Polísia Marítima hodi reforsa seguransa iha tasi no Unidade Espesiál Polísia (UEP) hodi haforsa seguransa iha fronteira Bobonaro, Covalima no Oe-Cusse hodi apoiu UPF.

Iha parte seluk, PNTL aprezenta mós relatóriu kona-ba asidente no insidente ne’ebé akontese iha territóriu Timor-Leste hanesan kazu Kera Sakti no PSTH halo asaltu malu iha festa kazamentu ida iha área Tibar nian.

Alende ne’e, PNTL aprezenta mós kazu feto ida ne’ebé hetan baku husi nia namoradu iha área tasi ibun Tasi-Tolu nian. Kazu ne’e rasik, PNTL sei halo investigasaun ba autór ida ne’ebé deskonfia ninia namoradu ho autór na’in tolu seluk.

PNTL mós investiga ona autór ida ne’ebé lori fatuk tuda negosiante Xineza ida too dezmaia iha ninia loja iha parte Audian, Dili.

Suspeitu ne’e rasik, PNTL haree tuir iha CCTV lori fatuk boot hamriik iha loja oin maka lori fatuk tuda tiha negosiante ne’e monu, no suspeitu halai liu.

Iha parte seluk, PNTL mós detein ona autór sira ne’ebé harii Grupu “Natureza Labarik” hodi lohi populasaun hodi adora fila fali sira.

Komandu PNTL aprezenta mós kazu asidente tráfegu ne’ebé akontese iha Munisípiu Covalima rezulta vítima ida mate, no kazu Liquiça pasajeiru ida monu husi karreta mate kedas.

PNTL mós relata kona-ba servisu polísia tránzitu nian durante agostu halo auto stop no pasa revista ba transporte públiku ne’ebé la iha dokumentu no viola regra tránzitu nian tenke selu multa ba Estadu Timor-Leste.

Osan sira ne’ebé PNTL rekolla hodi prosesu operasaun ne’e konsege hatama rihun $23 ba kofre Estadu.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here