Sesaun Plenária Iha Parlamentu Nasionál. Imajen Tatoli/ Egas Cristóvão

DILI, 17 setembru 2020 (TATOLI)—Parlamentu Nasionál (PN), kinta ne’e aprova ona proposta Orsamentu Jerál Estadu Estadu debate urjénsia.

Rezultadu votasaun ba pedidu Governu nian ho karatár urjénsia ne’e a-favór 54 kontra 0 no abstensaun 7.

Notísia Relavante: Governu justifika razaun 4 proposta OJE 2020 debate ho urjénsia

“Ho nune’e pedidu periodade urjénsia relativamente proposta-lei Orsamentu Jerál Estadu 2020 aprovadu no prosesu tuir-mai tenke la’o-tuir kalendáriu ne’ebé prepara. Se kalendáriu ne’e aprovadu hosi fó forsa ba parlamentu atu ejize Governu tenke kumpre mós,” Prezidente Parlamentu Nasionál, Deputadu Aniceto Longuinhos Guterres Lopes, aviza liuhosi plenária Parlamentu Nasionál, kinta ne’e.

Entretantu Xefe Bankada KHUNTO, Deputada Olinda Guterres hateten, orsamentu 2020 tenke debate ho urjénsia duni tanba povu tomak presiza osan.

“Impase polítiku ne’ebé la’o durante tinan tolu (3) nia laran fó impaktu dezenvolvimentu iha ita-nia rain, emprezáriu balu hahú taka sira-nia kompañia tanba laiha osan, tan ne’e orsamentu 2020 presiza aprova ho urjénsia,” dehan Xefe Bankada KHUNTO ne’e.

Entretantu, Vise-Xefe Bankada PLP, Deputadu Francisco de Vasconcleos, hateten orsamentu 2020 ne’e tenke urjénsia duni.

“Orsamentu ida-ne’e akumulativu tanba balun gasta ona depois ita atravesa mós COVID-19 hodi halo levantamentu ba fundu petrolíferu, tanba ita sei tempu barak liután atu diskute tan OJE 2021 nian. Ba ami fokus liubá ba iha OJE 2021 nian,” Deputadu PLP ne’e dehan.

Deputadu Bankada FRETILIN, Antoninho Bianco, louva ho justifikasaun hosi Ministru Finansa, Fernando Hanjam, tanba hahú di’ak oituan.

“Tenke halo di’ak liután iha OJE 2021 nian, segundu ha’u louva Komisaun C signifika bankada hotu-hotu vota unaminidade, ne’e la’ós fásil ne’ebé ita agradese halo buat ne’ebé loos. Ne’ebé, ha’u hanoin unaminidade iha Komisaun C ne’e justifika ona katak laiha ema ida atu kontra,” Prezidente Komisaun D ne’e hateten.

Nune’e mos, Deputada Bankada CNRT Virgínia Ana Belo hateten situasaun duodésimu ne’e naruk demais no loloos ne’e labele akontese.

“Karik situasaun ne’e la akontese, ita hotu-hotu tenke la’o-tuir konstituisaun, depois rejeisaun iha 17 janeiru mak depois iha kedas formasaun Governu foun ida karik buat ne’e la akontese. Katak, Governu bele aprezenta kedas orsamentu foun ida depois buat hotu-hotu la’o normál hanesan bainbain,” nia dehan. 

Entretantu, kalendáriu ba debate parte Komisaun C sei aprezenta ba Prezidente Parlamentu Nasionál hodi halo aprovasaun hafoin fó-sai ba públiku.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here