Xefe Bankada Frente-Mudança (FM), Deputada Isabel Maria Barreto Freitas Ximenes. Imajen TATOLI/Evaristo Soares Martins.

DILI, 17 setembru 2020 (TATOLI)—Mudansa polítiku ne’ebé akontese iha fulan-maiu 2020 liubá ne’e, loke-dalan ba bankada União Democrática Timorense (no) bankada Frente-Mudança fahe bankada iha Parlamentu Nasionál.

“Ita heee ba mudansa polítiku iha maiu 2020 liubá mak lori-dalan ba ami deside fahe bankada maibé la’ós entermu hosi partidu UDT no FM. Ami iha entendimentu di’ak tanba antes iha meza parlamentu, ha’u asume kargu entaun labele harii bankada mesak, agora bele ona harii bankada mesak,” Xefe Bankada Frente-Mudança (FM), Deputada Isabel Maria Barreto Freitas Ximenes, informa ba jornalista sira, iha resintu Parlamentu Nasionál, kinta ne’e.

Nia hatutan, iha momentu Prezidente Parlamentu Nasionál, Arão Noé de Jesus da Costa Amaral nia tempu labele fahe bankada tanba deputada ne’e asume kargu nu’udar sekretária meza palamentu nian.

Konkordánsia ne’e Prezidente Parlamentu Nasionál atuál, Aniceto Longuinhos Guterres Lopes, anúnsia iha fulan-jullu 2020 bazea ba deklarasaun hosi bankada UDT no FM.

“Ami hato’o deklarasaun katak ami hahú kuandu sesaun lejizlativa foun ami mós ofisialmente hahú bankada foun iha Parlamentu Nasionál. Razaun espesífiku liu laiha, tanba mudansa polítiku entaun partidu polítiku ne’ebé asentu parlamentá iha direitu harii bankada ketak ida,” nia dehan.

Xefe Bankada Frente-Mudança ne’e envolve  iha Komisaun Komisaun C (Finansa Públika ) no Komisaun ne’ebé trata asuntu Edukasaun, Juventude, Kultura no Siadadania).

“Bazea ba regra ne’ebé hatuur hosi Parlamentu Nasionál katak deputada ida hosi bankada ida bele envolve iha komisaun liuhosi ida katak másimu destaka iha komisaun rua maibé labele liuhosi komisaun rua, entaun ne’e prátika ida ke ita halo antes ona no to’o agora kontinua,” nia hateten. 

Iha loron 9 fulan-jullu 2020 liubá, Prezidente Parlamentu Nasionál, Deputadu Aniceto Guterres, informa ba plenária kona-ba pedidu Bankada UDT/FM ne’ebé atu fahe bankada ne’e.

Bankada UDT/FM atu fahe bankada ne’e bazea ba Rejimentu Parlamentu Nasionál (RPN) artigu 11 (Konstituisaun12 no Organizasaun), alínea 1 hateten deputadu sira-ne’ebé eleitu tuir lista partidu ka koligasaun partidu, bele halibur iha bankada parlamentár, la haree ba iha koligasaun pré-eleitorál partidu sira-nian ka lae.

Alínea 2 hosi artigu 11 ne’e, dehan 2 atu konstitui bankada parlamentár ida-idak tenke hato’o komunikasaun eskrita ba Prezidente Parlamentu, ne’ebé asina hosi deputadu sira-ne’ebé hola parte no indika bankada nia Prezidente no Vise-Prezidente, karik iha.

Alínea 3 hosi artigu ne’e esplika, kualkér alterasaun iha kompozisaun bankada nian tenke fó hatene ba Prezidente Parlamentu.  Alíena 4 fundamenta, funsaun prezidente, vise-prezidente ka membru meza nian inkompatível ho funsaun prezidente bankada parlamentár nian.

Alínea 5 hosi artigu 11 akresenta, bainhira bele, sei fó ba bankada parlamentár sira apoiu ne’ebé presiza tebes, hanessan gabinete traballu.

Ho nune’e hahú hosi 15 setembru 2020 bá-oin bankada UDT no FM estabele bankada ketak-ketak iha Parlamentu Nasionál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here