Helena Yolla Carlota de Araujo "Lolita". Imajen/Facebook.

Rai nakaras ona/rai-hun mutin daudauk ona/rai hakmatek/tasi hakmatek/foho hakmatek/balada fuik hakmatek/anin hakmatek/haksumik lia-foun/ami la rona ita-nia lian ona/ohin, despede ikus nian/boa viajen Mana Lola//.

DILI, 17 setembru 2020 (TATOLI)–Helena Yolla Carlota de Araújo ho naran estimada Lolita ne’e moris iha Dili iha loron 22 Novembro 1967. Lolita oan  datoluk (3) hosi maun-alin na’in-ne’en (6), hosi aman José Rafael de Araújo no inan Inés Maria Lay. Lolita mós iha alin hakiak na’in-rua mak Naldo Rei no mós João de Araújo.

Bainhira Indonézia Invade Timor-Leste iha 7 dezembru 1975, Lolita nia Pai José Jordão de Araújo ho nia Tiu Euricles Jordão no nia Tia Helena Maria de Araújo halai ba ai-laran liuhosi Aitahan Belar ho destinu Laulara no Remexio hodi husik hela oan na’in-neen (6) ho nian inan doben Inés Lay iha Kuluhun de Baixo. 

Lolita hahú nia eskola iha eskola primária Balide hosi 1977-1983, eskola pre-sekundária Paulus VI hosi 1983-1986 no eskola sekundária iha SMA Neg. 01 Becora hosi 1986-1988.

Iha 15 de Outubro, 1988, Lolita kaben ho Gaspar Luis Xavier Carlos iha igreja Motael. Rezultadu hosi sira nain-rua nia domin mak iha oan na’in-rua mak Ismenia Maria Peregrina de Araújo Carlos (Menita) ne’ebé moris iha 09 jullu 1988 no Rafael Gaspar de Araújo Carlos (Toze) moris iha 12 agostu 1991. Iha 1989, Lolita ho Gaspar muda ba Kupang bainhira Gaspar hetan servisu iha Banco Danamon Kupang. 

Iha Kupang, Lolita ho nia kaben Gaspar kontinua involve iha rede klandestina hodi kontinua luta ba ukun rasik-aan no konsege subar sobrevivente 12 de novembru 1991 sira ne’ebé halai ba Indonézia no barak mak husu azilu politiku iha Indonézia ba Portugal.

Iha Kupang, Lolita ho nia kaben suporta nafatin FALINTIL sira iha ai-laran no halo ligasaun metin ho FALINTIL rejiaun Ponta Leste liuliu Komandante Aluc, Renan Selak, Larimau, Mau Nana, Neves no sira seluk tan. Lola nia uma iha Kuluhun hanesan abrigu ba funu-na’in sira hanesan Keri Laran Sabalae, Sekretariu Ezekutivu da luta/Frente Clandestina no Doben Hadomi Timor durante tinan rua resin.  

Iha 1992, Lolita fila mai Dili ho nian oan na’in-rua (Menita ho Toze) tanba intelejensia sira komesa halo presegisaun ba sira iha Kupang maibé nia kaben Gaspar kontinua servisu iha ne’ebá (Kupang). Iha loron 10 agostu, Lolita nia kaben Gaspar fila mai Dili atu selebra nia oan mane Toze nia aniversáriu dahuluk iha loron 12 Agostu 1992. 

Iha 15 agostu 1992 dadeersan nakukun tuku 05.00, tropa Indonézia asalta nia uma iha Kuluhun de Baixo tanba hetan informasaun katak fatin ne’e ema subar membru FALINTIL sira ho intensaun atu kaptura Gaspar, tanba funu-maluk balun deskobre nia atividade iha rede klandestina bainhira ema kaer Agostinho Maulaku iha Aeroporto Dili, ne’ebé kaer ho dokumentu lubuk ida-ne’ebé atu entrega ba KTT Non Block iha Jakarta.

Gaspar konsege halai sai hosi uma no inimigu la konsege kaer nia. Ho atuasaun tropa Indonéziu ho ekipamentu militár mai serku uma, halo Lola nia oan ne’ebe sei kiik hanesan Menia no Toze hetan traumatizasaun ne’ebé boot tebes iha fulan barak nia laran, tanis no hakfodak hela de’it bainhira haree ema hatais roupa verde-makerek ho kilat.

Liu tiha semana rua, Lola rona katak Gaspar halai ona ba Kupang hodi kontinua nia servisu iha Banku Danamon. Iha loron 3 setembru 1992, inimigu kaptura Gaspar iha nia servisu fatin iha Kupang no lori mai Dili. SGI sira tortura nia hosi Kupang to’o Dili.

Iha loron 06 setembru 1992, sira kaer Lola nia alin haki’ak Puto Naldo Rei lori ba SGI Colmera. Iha loron 07 setembru mak Puto Naldo rei hasoru malu ho Gaspar iha sela SGI, Colmera, Dili, maibé Gaspar la’o mós ladi’ak no nia oin metan hotu ho roupa servisu nian maibé nakles hotu kedas no la’o ho bonko de’it tanba ruin sira-ne’e tohar hotu. 

Iha 14 Setembru 1992, SGI sira lori Gaspar ho Puto Naldo Rei ba Komarka Balide sulan iha sela nakukun. Iha loron 15 setembru 1992, SGI mai lori sai Gaspar no Marcos Xavier iha kalan, no to’o agora sira la fila mai.  Lolita buka nia kaben Gaspar iha fatin-fatin maibé la konsege hetan no tenke tau-matan mesak ba nia oan ki’ik na’in-rua (2) ho servisu laek.

Lola tenke ajuda nia inan Inés ne’ebé ho nia abilidade makaas iha suku halo bordadu no pontu kruz ne’ebé halo igreja fihir nia liman-badaen ne’ebé furak konsege sustenta sira-nia moris no mós hetan tulun hosi nia maun no alin sira ne’ebé hela iha Australia. 

Bainhira organizasaun FOKUPERS estabelese iha Timor-Leste ne’ebé lidera hosi Maria Domingas “Micato” Alves, Lola ba servisu iha 1997 too 2000. Lola nia intensaun atu tau-matan ba labarik sira-ne’ebé la hetan atensaun másimu hosi sira-nia família. Ho tempu hanesan bele fó konsellu ba nia oan Menia ne’ebé hetan traumatizasaun maka’as bainhira inimigu halo asaltu iha nia uma iha 1992. 

Ema ne’ebe fó konsellu ba Lola mak Padre Alberto Ricardo oinsá hasoru problema sira ne’ebé nia enfrenta durante tinan hirak nia laran.  Iha janeiru 2000, Lola hasoru malu ho mane ida, mane ne’ebé foin sai hosi dadur iha Semarang-Indonesia ho simu kastigu perpetua tanba lidera demonstrasaun 12 de Novembru 1991 ho koñesidu Maskre Santa CRUZ, Señor Gregorio Saldanha “Mouris”. Iha dadur laran, nia ho nia kompañeiru sira promete katak bainhira funu hotu, nia hakarak kaben ho feto faluk funu-nain ida hodi dignifika sira. Ikus mai Maun “Giri” realiza duni promesa ne’ebé nia promote ba nia-aan.

Maun Giri ho Lola kaben iha 21 de Novembru 2003 iha Igreja Balide ho kazamentu ne’ebé simples no hetan apoiu másimu hosi Amo Bispo Dom Alberto Ricardo. Rezultadu domin hosi Maun Giri ho Mana Lola mak hamoris jerasaun foun ho naran Gabriel Gregorio de Araújo da Cunha Saldanha “Mouris” ne’ebé moris  iha 29 janeiru 2002 no Fatima Inés Margarida de Araújo da Cunha Saldanha “Mouriza” iha 25 Fevereiru 2003.

Maun Giri ho Lola hatudu ezemplu ne’ebé furak tebes durante sira moris hamutuk. Sira hatudu domin ba familia, hatudu domin ba nia oan sira maski aman ketak-ketak. Padrastu la’ós perfeitu maibé Maun Giri halo duni knaar ho di’ak hodi tau-matan ba nia oan na’in-haat (4). Bainhira Gabriel moris, Toze no Menita promete hodi bolu maun Giri sai sira-nia PAI. Ita la espera katak domin ne’ebé sira kuda sai realidade maibé Moromak iha planu rasik. 

Lola hetan moras stroke iha 23 novembru 2011 no halo tratamentu iha Dili no fatin hotu-hotu ne’ebé nia hatene. Lola ema ida-ne’ebé forti no iha motivasaun boot hakarak moris naruk. Lola konsege ultrapasa moras stroke iha tinan neen (6) nia laran no bele la’o ba-mai ho di’ak. Maibé Maromak tenta nafatin hodi koko Lola nia motivasaun moris nian.

Iha fulan juñu 2016, Lola hetan moras kankru susun ba halo tratamentu iha iha Siloam Bali kuaze fulan neen (6).  Iha fulan fevereiru 2020, antes COVID-19 tama Timor-Leste, rezultadu fó sai katak Lola nia moras kura 100% hosi doutór ne’ebé halo tratamentu ba nia.

Iha loron 20 maiu 2020, Lola lakon nia alin istimade Angela ne’ebé mate iha Hospital Nasional Guido Valadares ne’ebé hakoi iha rate sorin. Iha 15 agostu 2020: Lola halo devosaun ba Na’in Feto Ramelau no organiza família sira hodi halo peregrinasaun no promete atu fila fali ba Na’in Feto Ramelau iha loron 15 setembru 2020. Iha 14 setembru 2020, tuku 11:45, Lola hetan atakasaun fuan no lori ba Hospital Nasional Guido Valadares. Iha dia 15 Setembru 2020 oras 00:20, Lola hakotu iis.

Lola nia maun Armenio, nia alin Celita no nia alin Euricles ne’ebe hela iha Australia labele mai asiste nia serimónia funebre tanba situasaun COVID-19 ne’ebé bandu sira atu tama Timor-Leste.  Dalan ne’ebé naruk ho viajen moruk durante nia moris, Lola mate iha loron istoriku iha data 15 setembru, nia kaben Gaspar ema lori lakon, 15 agostu 2020 nia halo devosaun ba Na’in Feto Ramelau no 15 setembru 2020, nia hakotu iis.

Rai nakaras ona/rrai-hun mutin dadauk ona/rai hakmatek/tasi hakmatek/foho hakmatek/balada fuik hakmatek/anin hakmatek/haksumik lia-foun/ami la rona ita-nia lian ona/ohin, despede ikus nian/boa viajen Mana Lola//.

Ó hatene mundu nia furak/ó hatene mundu nia moruk no midar/ho korajen boot tebes/ó terus resik ona/Maromak iha planu diak liu ba ó, Mana Doben/hakmatek iha reinu lalehan ba moris rohan-laek/adeus mana Lola/ita-nia lianami la rona hori ohin ba oin!//.

TATOLI/Facebook: Maurice Pereira de Jesus

1 KOMENTÁRIU

HAKEREK NO HATÁN

Please enter your comment!
Please enter your name here