Xefe Suku Gugleur, Postu Administrativu Maubara, Munisípiu Liquiçá, Guido Ramos Ribeiro, hamutuk ho xefe aldeia sira hosi aldeia haat ne'e. Imajen TATOLI/Evaristo Soares Martins.

DILI, 17 setembru 2020 (TATOLI)—Xefe Suku Gugleur, Postu Administrativu Maubara, Munisípiu Liquiçá, Guido Ramos Ribeiro, hato’o informasaun kona-ba komunidade sira aldeia haat (4) iha Suku Gugleur ne’ebé seidauk hetan subsídiu $200 ba Parlamentu Nasionál.

Notísia Relavante: Ekipa MSSI finaliza ona análiza ba reklamante 15.280

Xefe Suku Gugleur ne’e hato’o ba Parlamentu Nasionál liuhosi Komisaun A (Justisa no Konstitusionál) nune’e deputadu sira bele husu esplikasaun ba Governu kona-ba komunidade hosi suku refere ne’ebé povu balun seidauk hetan osan COVID-19 nian.

Tuir Sensu uma kain 2015 nian, populasaun hamutuk ema na’in-691 no totál populasaun 3,716 komposta hosi mane na’in-1,856, feto na’in-1860.

Iha kazu komunidade hetan pagamentu subsídiu COVID-19 nian hamutuk uma-kain 349 no hosi 349 ne’e aldeia haat (4) mak totalmente seidauk subsídiu no aldeia balun mós seidauk selu hotu.

Aldeia haat (4) ne’e mak hanesan Aldeia Lebulugor hamutuk na’in-127, Dair na’in-74, Puquelete na’in-50 no Aldeia Lauvou na’in-85.

Maske nune’e, iha aldeia Erito uma-kain 10 mak seidauk hetan, aldeia Kaikasa uma-kain ida (1), Lisalara uma-kain ida (1) no Vatumori uma-kain ida (1).

Entretantu, família na’in-349 iha suku refere ladauk hetan pagamentu sibsídiu COVID-19 hosi Governu iha aplikasaun Estadu Emerjénsia.

“Ohin, ha’u ho xefe aldeia sira-ne’e mai hato’o ba deputadu sira iha Komisaun A kona-ba osan COVID-19 nian. Ami aldeia haat naran lakon totál nune’e señor deputadu sira bele hato’o ba Governu para tempu badak selu ami-nia ema sira-ne’e. Ami-nia ema sira ne’e bolu atu tuir reuniaun kona-ba estadu nian, agora sira lakohi partisipa ona,” Xefe Suku Gugleur ne’e informa ba jornalista sira, iha Parlamentu Nasionál, kinta ne’e.

Nia dehan, ho osan COVID-19 ne’ebé aldeia 4 ne’e seidauk simu, kada loron komunidade sempre ejize ba xefe suku no xefe aldeia sira.

Nia esplika, foufoun hatama naran ne’e komunidade suku refere hatama naran hotu kedas maibé taka iha kuadru avizu sede nian ne’e, komunidade aldeia haat naran lakon totál.

“Ami hatama ho dokumentu kompletu. Ami haree ne’e fallansu ne’e keta iha nasionál karik,” xefe suku Gugleur ne’e hateten.

Jornalista: Evaristo Soares Martins

Editór: Cancio Ximenes.

HAKEREK NO HATÁN

Please enter your comment!
Please enter your name here