Prezidente Komisaun C (Finansa Públika), Deputada Maria Angélica Rangel. Imajen Tatoli/Egas Cristovao.

DILI, 17 setembru 2020 (TATOLI)—Komisaun C (Finansa Públika) konklui ona relatóriu no paraser urjénsia ba proposta Orsamentu Jerál Estadu (OJE) 2020 no orsida lokraik sei aprezenta ba plenária Parlamentu Nasionál hodi halo diksaun no votasaun.

Notísia Relavante: Aban, PN husu Governu justifika pedidu ho karáter urjénsia ba proposta OJE 2020

“Ami simu proposta Osramentu Jerál Estadu 2020 ne’e ho karáter urjénsia, rejimentu dehan tenke konklui iha 24 oras no agora ami foin hotu halo aprovasaun ba relatóriu no pareser ho karatér urjénsia, tanba ne’e orsida tuku 15.00 lokraik ami sei debate iha plenária,” Prezidente Komisaun C Deputada Maria Angélica Rangel, informa ba jornalista sira, hafoin aprova relatóriu no pareser ne’e, iha Parlamentu Nasionál, kinta ne’e.

Deputada Maria Angélica Rangel fó-sai katak, aprovasaun relatóriu no pareser ho karatér urjénsia ne’e ba proposta OJE ho unanimidade.

“Ami halo ona ami-nia pareser katak Governu nia fundamentu mak tanba durante ne’e orsamentu ne’e hetan rejeisaun hosi Parlamentu Nasionál, durante ne’e mós ita la’o ho duodésimu entaun aprova pareser ho urjénsia duni,” nia dehan. 

Iha aprovasaun pedidu karáter urjénsia hosi nível Komisaun C nian ne’e partisipa hosi deputadu bankada parlamentár hotu-hotu ne’ebé destakadu iha komisaun refere.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here