Primeiru-Ministru no Ministru Interiór, Taur Matan Ruak. Imajen Tatoli/Egas Cristovão

DILI, 17 setembru 2020 (TATOLI)-Primeiru-Ministru no Ministru Interiór, Taur Matan Ruak, fó ona orinetasaun ba Vise-Ministru Interiór, António Armindo no Polísia Nasionál Timor-Leste (PNTL) atu bolu líder arte-marsiál hanesan Persaudaraan Setia Hati Terate (PSHT) atu fó hanoin membru hapara movimentasaun ilegál iha fronteira terrestre atu evita propagasaun surtu COVID-19 hosi nasaun viziñu Indonézia, liuliu iha Timór Osidentál (Nusa Tenggara Timur).

“Ami halo kontaktu ona ho líder PSHT atu sira bele koopera tanba risku ne’e boot, ita-nia labarik sira ba ilegalmente no sira lori moras (surtu COVID-19) mai família no komunidade,” tenik PM Taur iha Palásiu Prezidensiál, Bairro Pité, kinta ne’e.

Xefe Governu hato’o kestaun ne’e bainhira halo enkontru semanál ho Prezidente Repúblika, Francisco Guterres ‘Lú Olo’ hodi informa seguransa fronteira terreste iha ámbitu implentesauan Estadu Emerjénsia no aprezentasaun Orsamentu Jerál Estadu (OJE) 2020 ba Parlamentu Nasionál iha loron tuirmai.

Tuir atuál Ministru Interiór, iha fatór tolu ne’ebé kontribui ba movimentasaun ilegál iha fronteira terreste.

“Movimentasaun ilegál sai preokupasaun boot, ne’ebé ami haree hela ho forma atubele ultrapasa situasaun ne’e, maibé iha fatór tolu importante ne’ebé kontribui ba pasajen ilegál iha fronteira hanesan relasaun familiár entre populasaun sira iha fronteira, tranzisaun komérsiu  no grupu arte-marsiál. Liuliu ikus ita-nia oan sira hosi PSHT bá-mai ilegalmente,” subliña PM Taur.

Tanba ne’e, Ministru Interiór ne’e fó ona orientasaun ba Vise-Minsitru no Komandante PNTL atu haree posibilidade atu reforsa seguransa iha fronteira, enkuantu maski Timor-Leste iha ona númeru positivu COVID-19 maib’e kuaze rekuperadu hotu ona no seidauk rejista ema mate ba moras ne’e.

Eis Prezidente Repúblika ne’e husu ba sidadaun hotu tenke kontribui asegura no impede kontajiu COVID-19 atu labele prejudika ba sosiedade.

“Ha’u hakarak apela ba ita-nia oan sira atu ajuda, kontribui ba seguransa sidadaun sira tanba moras ne’e la’ós buka le’et de’it no la hili ema,” nia fó hanoin.

Governu mós kontinua foku ba munisípiu sira ne’ebé iha fronteira hanesan Bobonaro, Covalima no Oé-Cusse atu reativa filafali Konsellu Seguransa Munisipál atu tau-matan no fó kontribuisaun atu asegura movimentu ilegál.

“Ita daudaun ne’e halo investigasaun maka’as atu buka hatene no deteta  faktu sira ba ema ne’ebé kontribui ba movimentu ilegál ne’e bele fó medida hodi minimiza pasajen ilegál ne’e,” dehan Xefe Ezekutivu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here