Fronteira terrestre Mota-ain, Batugade, Imajen Tatoli/António Gonçalves

DILI, 17 setembru 2020 (TATOLI)-Ministériu Interiór (MI) liuhosi Diresaun Jerál Servisu Migrasaun (DGSM, sigla portugés) fó sai oráriu loke fronteira terrestre haat hanesan Salele, Mota-ain, Sakato, no Oé-silo.

Intensaun loke  pontu entrada terrestre sira hodi fasilita sidadaun estranjeiru no nasionál sira ne’ebé iha planu atu hala’o viajen tama ka sai liuhosi pontu estrada sira ho dalan legál durante períodu Estadu Emerjénsia dalimak.

Nune’e, oráriu  loke fronteira terrestre Timor-Leste sei realiza fali iha loron 29 setembru 2020, hahú tuku 10:00 to’o 13:00 oras Timor-Leste.

“Iha loron 29 setembru durante oras tolu nia-laran autoriza movimentu sidadaun estranjeiru no nasionál sira ne’ebé iha planu hala’o viajen bele sai Indonézia no tama territóriu nasionál Timor Leste,” refere nota hosi MI, ne’ebé Agência Tatoli asesu iha kinta ne’e.

Notísia Relevante: Governu aprova medida ezekusaun ba deklarasaun EE dalimak

Governu deside loke fronteira loron-17 dala ida

DGSM fó sai oráriu ne’e iha loron 13 setembru relasiona ho movimentasaun iha pontu estrada sira.

Durasaun tempu loron-17 hodi loke filafali pontu entrada sira, DGSM konta hahú hosi loron 13 setembru 2020, tuku 13:00 to’o 24:00 hanesan loron dahuluk abertura, hafoin konta ba oin to’o loron-17 ne’ebé monu iha 29 setembru.

“Karik iha mudansa kona-ba oráriu loke fronteira terrestre Timor-Leste, sei hala’o ho despaisu ka orden verbál hosi Ministru Interiór ka Vise-Ministru Interiór ne’ebé hirarkiamente ezekuta husi Diresaun Jerál Servisu Migrasaun Timor-Leste,” subliña nota ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here